INI-mi attartortoq: Naammagittartaqaagut
Aasianni ininik attartortut INI A/S-ip allaffianut saaffiginnikkaangamik naammagittartariaqaqisut, najugaqartut ilaat John Larsen oqaluttuarpoq.
John Larsen Aasianni najugaqartut siulersuisuini siulittaasuusimasoq, INI A/S-ip Aasianni sullissinera pakatsinaraa. Nammineerluni aamma nuanninngitsumik misigisaqarfiginikuugamiuk. Tassami INI-ip allaffeqarfianut iseqqusaajunnaarsimavoq, taamaammallu nuliata akiligassat kisimi akileriartorsinnaavai.
John Larsen 1993-imiit siorna ilanngullugu, Aasianni najugaqartut siulersuisuini ilaasortaallunilu siulittaasuusarsimavoq. Taamaammallu ineqarnermut tunngatillugu, inunnik ikiunermut sungiussisimasuuvoq. Ilaquttanili saaffiginnittoq ikiortillugu, nuanninngitsumik misigisaqarpoq.
John Larsenip ilaqutaata, najugaqarfiani paarlerni igalaaq aserorneqarsimammat A/S INI-mit akiligassaq, tassunga pisuunngitsumut akiligassanngortinneqarsimavoq. Akiliinngippallu anisitaanermik kinguneqartissallugu siorasaarisimapput.
Taamaattoqarnera peqqutigalugu John Larsen, ilaqquttani ilagalugu INI-p allaffeqarfianut nassuiaatissarsiniarlutik saaffiginnikkiartorput. Oqaatsinili sakkortunaalaarsimallugit nammineq oqaatigaa.
- Sullissineq nalugussiuk, allamik sulisussarsiorniaritsi uagut taamaattunik sullissisoqarusunngilagut. Taanna ajuallaatigisimagunaramikku, tassunga allaffeqarfimmut isequsaajunnaartippaanga. John Larsen taama oqarpoq.
Taannali kisimiinngilaq, arlaqartummi INI-p allaffeqarfianut iseqqusaanngillat.
- Aamma tusaamavara allanik taamaaliortoqartarsimasoq. Tamakkua pissusissaanngillat, oqartussaaqataanermut aallaaviunngillat aamma oqartussaaqataaneq taamatut ilusilerneqarsinnaanngilaq. John Larsen taama oqaluttuarpoq.
Nammineerlunilu INI-p allaffeqarfianukarluni, ineqarnermut akiliaartortarsimagaluarpoq. Nuliatali kisimi maannakkut isumagisinnaavaa, siullermeerlunili saaffiginnimmat saaffiginnittarfimmiit isersinnaanersoq apeqqusersimagaluarpaat.
- Aatsaat akuerseqqaalluni oqarfigisimavaa, illinnunngooq ajornanngilaq. Juulliuna aqaguaguttoq, uanga nammineerlunga akiliaartoraluarama oqarfigineqarpunga: illit iseqqusaanngilatit. Pakatsinaqaaq, aammalu ukiorpaaluit ineqartunik sullissinikuulluni pakatsinartupilorujussuuvoq. John Larsen taama oqarpoq.