A/S INI meeqqanut unammisitsilerpoq

Inissiaatileqatigiiffik INI meeqqerivinnut atuarfinnullu titartaanermik unammisitsinermigut meeqqanut eqqumiitsuliortunut akissarsisitsiniarpoq.

Unammisitsineq Kalaallit Nunaanni Titartaanermut Grand Prix-mik taaneqarpoq, meeqqallu nassaassarsiullaqqissusiat akissarsisitsiviginiarneqarpoq.

Unammisitsineq meeqqanik titartaallaqqissunik nittarsaassiffiuvoq, titartakkanilu ”Najugaqarfiit” qulequtaritinneqassalluni.

Pinnguartarfik, meeqqat sinittarfiat, angerlarsimaffik ilaqutariillu assitarineqarsinnaapput.

Titartakkat kusanarnerpaat taasisitsinikkut nassaarineqassapput, tassa Melodi Grand Prix-misut iliornikkut innuttaasut nuannarisaminnik taasisinneqassammata.

INI A/S-ip nittartagaatigut (www.ini.gl-imut) isernikkut aggustip ulluisa pingajuat ilanngullugu titartakkanik nuannarisanik toqqaasoqarsinnaassaaq.

Isiginnaartitsisartoq Rassi Thygesen titartakkanik naliliisartuussaaq, innuttaasullu peqatigalugit titartakkat pingasut toqqassavai.

Ajugaasoq 5000 koruunit nalinganik gavekort-innassaaq, tullersortaasorlu 2500 koruunit nalinganik gavekortinnassalluni.

Pingajuattut inissittoq 1500 koruunit nalinganik gavekortinnassalluni.