INI kingusinaarluni akiliisarpoq

Inissiaatileqatigiiffiup A/S INI-p akiligassani ulloq akiliiffissaq eqqorlugu akilerneq ajorpai. INI sukkanerusumik akiliisalerniassammmat, Nunaqavissut Suliffiutillit Kattuffiat, NUSUKA, ilaasortani sinnerlugit avammut taama nalunaaruteqarpoq.

- Arriippallaamik INI akiliisarpoq, taamaattoqartillugulu namminersortut anginngitsunik suliffiutillit eqqorneqarnerpaasarlutik. Ilaatigut INI-p qaammatit marluk angullugit akiliiniaruusaartarnera suliffiutillit minnerit aningaasaqarnerisa nammassinnaaneq ajorpaat, ilaatigullu akiliisinnaajunnaartarlutik matuinnartariaqartarlutik, NUSUKA allappoq.

INI-p akiligassaminik sukkanerusumik akiliisalernissaa sulissutigeqqullugu Nunaqavissut Suliffiutillit Kattuffiata, Naalakkersuisoq Jørgen Wæver Johansen allaffigaat.

NUSUKA-p siunnersuutigaa, INI naalakkersuisunit piumaffigineqassasoq, sulianut 30.000 koruunit inorlugit nalilinnut suliarinnittoqarsimatillugu, ullut 14-t qaangiutsinnagit INI-p akiliisarnissaanik. 30.000-llu sinnerlugit nalilinnik suliaqartoqarsimatillugu, ullut 28-t qaangiutsinnagit INI-p akiliisarnissaanik NUSUKA aamma siunnersuuteqarpoq.