INI: Inimut akiliutit qaffappagut akiitsoqarpallaat ilaatigut pissutaallutik
Inissiat aserfallassimasut aaqqissuunneqarnissaannillu pisariaqartitsisut qaffaanermut pissutaapput aammattaarli inissianik attartortut ilaasa akiliisannginnerat qaffaanernut pissutaaqataanerullutik.
Illoqarfinni amerlanerni inimut akiliutaasartut sooq qaffanneqarnissaat pillugu, Inissiaatileqatigiiffik A/S INI-p attaveqarnermut pisortaata, Else Løvstrøm-ip ima nassuiarpaa.
- Ulluinnarni uagutsinnut sullissisut aningaasartuuteqarpata taava akiligassanik qaffaasariaqartarpugut. Qaffaanitsinnullu pissutaaqataasunut ilaavoq illoqarfinni inissiat ilaat inigineqanngitsut amerlammata aamma najugaqartut ilaat akiitsoqartarmata, Else Løvstrøm oqarpoq.
Nunatsinni illoqarfiit ilaanni inissiat aserfallannerusimapput illoqarfiillu ilaanni ininik attartortut akiliinngitsoortarneri takussaanerullutik. Tassalu tamakku pisooqataallutik inimut akiliutit ukiortaamiit qaffanneqassapput.
- Kommune Kujallermi kommunalbestyrelsip qaffaaneq suli akuerinngikkaluaraat oqaatigisinnaavara, kommunimi tassani ineqartut akiitsoqartut amerlanerpaammata.
Else Løvstrømip oqaatigaa, Kommune Kujalleq aamma Qaasuitsup Kommunia qaffaanermi aningaasanik aallerfigineqarnerussasut, kisiannili kommunini taakkunani kommunalbestyrelse-t aatsaat qaffaanissamut akuersippata taamaaliortoqassalluni. Naatsorsuutigineqarporlu kommunini taakkunani qaffaaneq pissassoq ukiup nutaap aallartereernerani.
Else Løvstrøm-illu nassuiarpaa, qaffaanermut kisitseriaaseq qanoq ittoq atorneqarsimanersoq. Tassalu ininik aserfallanerusimasuni attartortut 2 procentimik qaffaavigineqassapput pitsaanernili attartortut 10 procent angullugu qaffaavigineqassallutik.
Aningaasallu qaffaanermi pissarsiarineqaartut atorlugit init aserfallassimasut aaqqissuunneqassapput, aamma Inissiaatileqatigiiffik aserfallatsaaliinermut aningaasanik atuinerulernissamik periarfissinneqassalluni.
Inimut akiliutit qaffanneqarnissaat pillugit allakkat ineqartunut amerlanernut nassiunneqareersut, Inissiaatileqatigiiffik A/S INI-ip atteveqarnermut pisortaata, Else Løvstrømip oqaatigaa.
