Ini a/s ineqarnermut peqqussummik unioqqutsitsivoq

Ini a/s-ip Nuummi attartortuni 2005-imi januaarimiilli innaallagissamut nammineq Nukissiorfimmut akiligassaminik akiliisittarsimagai, Sermitsiami ullumi saqqummersumi allaaserineqarpoq.

INI A/S-imi attartortoq Niels Peter Gundelach innaallagiap illuminut erngup aqqutaanik qeritsaaliuisup qamitaanissaanik Nukissiorfimmiit sioorasaarneqarnermi kingorna paasivaa inissiaatileqatigiiffik INI a/s inatsisinik unioqqutitsilluni attartortuminik akilersuisitsisoq.

INI A/S-ip erngup aqqutaata qeritsaaliornerannut innaallagissamut aningaasartuutit attartortunut ingerlateqqissinnaanngikkai, Attartornermut peqqussummi 2005-imeersumi allaqqavoq.

Tamatuma kingunerisaanik attartortoq maalaaruteqarpoq, 3.000 koruuninillu utertitsivigineqarluni. Tamatuma kingunerisaanik Nukissiorfiit attartortut allattorsimaffiat INI a/s-imut piumasarisimagaluarpaat, sulili tigusimanagu.