INI eqqartuussivilersuunneqarsinnaanersoq aalajangiiffigineqanngilaq

apriilip 08-at 2005 14:43

Ullumi nunatta eqqartuussiviani saqqummiunneqarpoq Narsami Inissiaatileqatigiinni immikkoortortaqarfik 128-p Namminersornerullutik Oqartussat INI A/S -llu 1995-miit 2002-p tungaanut inimut akiliivallaartarsimanermut tunngatillugu eqqartuussivimmut tunniussisinnaanersut.

Naalagaaffiup sinniisuata 2002-mi nalunaarutigivaa INI A/S-i ininut akiliutinik qaffasippallaartunik akiliisitsisarsimasoq. Taamani Inissiaatileqatigiinni immikkoortortaqarfik 128-i Narsamiittoq aalajangerpoq INI A/S eqqartuussisunut tunniunniarlugit.

Jens Væggemosep Inissiaatileqatigiinni immikkoortortoqarfimmi 128-mi siulittaasuusoq eqqartuussisunut tunniussinertik ima nassuiarpaa:

- Anguniarparput 1995-miit 2002-p tungaanut annertuallaartumik inimut akiliutaasarsimasut atuisunut utertinneqarnissaat. Agguaqatigiissillugu aningaasat 30-35.000 kronit tungaanut atuisunut ataasiakkaanut utertinneqartussaassapput, Jens Væggemose oqarpoq.

Akiliutinillu utertitsisoqassappat atuisut 1000-t sinnerlugit utertitsiffigineqassapput, aningaasallu 2 millionit sinnerlugit akiliutaavallaarsimasut oqaatigineqarpoq.

Namminersornerullutik Oqartussat eqqartuussisunut tunniunneqarput tassungali atatillugu apeqquserneqarpoq Inissiaatileqatigiinni immikkoortortaqarfik 128 peqatigiiffiunersoq, peqatigiiffiunngikkuni eqqartuussisulersuussisinnaanngimmat, tamannalu eqqartuussisunut nalilerneqartussanngortinneqarpoq.

Suli oqaatigineqarsinnaanngilaq qaqugu nunatta eqqartuussivianit aalajangerneqassanersoq, Namminersornerullutik Oqartussat eqqartuussisulersuunneqassanersut.