INI aningaasarpassuarnik akiligassinneqarsinnaavoq

Inissiaatileqatigiiffik A/S INI siorna ingerlalluarsimasutut nalilerneqarpoq.

Taamaattorli eqqartuussinermut tunngasoq suli qaangeruminaattoq INI ukiumoortumik nalunaarummini allappoq.

Allaffissornermut akiliuteqarpallaarsimanermik Nuummi ineqartut ilaasa naammagittaalliutaannut INI siorna ajorsarpoq. Eqqartuussummik nangitsinissaq INI-p 2004-mi ingerlateqqitaa, Eqqartuussiviit Qullersaata aappaagu aalajangiiffigissagunarpaa. Immikkoortortaqarfiit allat aningaasanik utertitsivigineqarnissaminnik aamma piumasaqassappata, tamanna INI-mut 100 millioni koruuninik naleqariaannaavoq.

Ukiumoortumik nalunaarusiami INI-mi kukkunersiuisut allapput, INI-p ingerlanneqarnerani Eqqartuussiviit Qullersaannit taperserneqarnissaq aalajangiisuussasoq, utertitsinissamut aningaasanik akissaqartoqaranilu immikkoortitsisoqarsimanngimmat.

INI eqqartuussinermi ajorsassagaluarpat, piginnittut Namminersornerullutik Oqartussat kingunissaanik ilisimatinneqareersut, INI-p pisortai allapput.