INI allamik inissaqartitsinngikkuni anisitseqqusaanngilaq

Paamiuni ilaqutariit katillugit 23-t sapaatip akunnera kingulleq iniminnit anisitaapput. Amerlanerit piffissaq sivisooq iniminnut akiliisarsimanngimmata inissiaatileqatigiiffiup INI-p politiillu inaannit anisippaat.

Ilaqutariilli allamik inissamik tunineqartinnatik anisinneqarsinnaanngillat, INI-miillu nukippassuit tassunga atorneqartarput. INI isumaqarpoq suliassat taamaattut kommuniniittariaqaraluartut.

Anisitsinermili inissiaatileqatigiiffik allamik inissaqartitsinngikkuni anisitseqqusaanngilaq, politiinillu piumasarineqartarpoq anisitaasut ineeqqamik inissiaatileqatigiiffimmit tunineqarnissaat. Inisseeqqinnermi inissiani inissiat anginerit atorneqartarput. Assersuutigalugu tallimanik initalik ilaqutariinnut tallimanut, ilaatigut arfinilinnut tunniunneqarsinnaasarput, tassani igaffik uffarfillu ataatsimoorunneqartarlutik. Nuummi Paamiunilu immikkoortortaqarfimmi pisortaq Susie Kristiansen oqarpoq inisseeqqinnermi nukippassuit atorneqartartut.

-Nukipparujussuit atortarpagut. Inigisamut akiliutit pinngitsooratik boligafdelingsbudget-imut, tassa inissiat tamarmik qaammammut isaatissaattut naatsorsorneqartarput. Inisseeqqinnerli atorneqaraangat soorunami boligafdelingip aningaasat taakku annaasarpai, uagullu pisussaaffigisarparput taakku inisseqqinneqarsimasut akiliisinniaqqissallugit ilaatigullu aamma pisataat ilanngullugit, Susie Kristiansen oqarpoq.

Susie Kristiansen isumaqarpoq, akilisinnaanngitsoqaraangat kommuni ikiorsiinerusariaqaraluartoq.

-Isumaga malillugu kommuneqarfinni socialinik sullissisut ikiorsiinerusariaqaraluarput, soorlu illumut akiliullugit inissaannilluunniit socialbolig-itut allamik innersuullugit, Susie Kristiansen oqarpoq.

Inissiisoqartillugu inimut akiliutigineqartartoq atukkanut akiliutaasarpoq, soorlu innaallagisamut imermut assigisaanullu.