Ini A/S akiliisitsiumanngitsoq

novembarip 06-at 2004 10:45

Inissiaatileqatigiiffiup INI-ip ulluni makkunani ininut akiliutinik akiliisitsiniarnini ajornartorsiortigaa.

Suliffeqarfiit arlalissuit ukioq manna sulisumik utaqqiisaagallartumik attartornerinut akiligassat allagartaannik tigusaqarsimanngillat.

Nukissiorfiit, Namminersornerullutik Oqartussat, KNR-ilu ukiaq mannamut qaammatinut arfineq pingasunut akiligassat allagartaannik tigusaqarsimanngillat. Akiligassat 1 millioni koruunit angullugit amerlassuseqarput.

Atuisut akiligassaasa isumaginerinut aqutsisup Mogens Hansenip siorna qarasaasianik taarsersuisimanermi ajornartorsiut pilersimanerarpai, taamaammallu suliffeqarfiit sulisumik utaqqisaagallartumik ininik attartornerisa akiliisitsiniutigineri maannamut iluatsissimanngitsoq.

Mogens Hansen-ip akiligassaqarneq ulluinnarni INI-p aningaasaqarneranut akornutaanngitsoq, erniallu isertitsissutigineqartussat ilaannaminnguisa annertussusaanik  naleqartoq nassuiaatigaa.