INI akileerujussuarsinnaavoq

INI A/S-ip Nuummi najugaqarfimmut 181-imut tassa Atertamut akiliisussanngortinneqarnerminik Eqqartuussiviit Qullersaannut ingerlatitseqqiiniarnera akuerineqarpoq. Eqqartuussiviit Qullersaata najugaqarfik Atertaq ilalissappagu, tamanna siunissaq ungasinnerusoq eqqarsaatigalugu, INI-mut 100 million koruunit missaanni naleqarsinnaavoq.

INI A/S-ip 1998-imiilli Atertami najugaqarfimmik ingerlatsinermut atatillugu allaffissornermut annertunaarlugu akiliutigititaminik katillugit 1,5 million koruuninik utertitsisariaqarneranik Østre Landsrettip siorna novembarimi aalajangerneranut atatillugu, inissiaatileqatigiiffiup Eqqartuussiviit Qullersaannut ingerlatitseqqiinissamik suliakkiissutaa, Eqqartuussinermik ingerlatitseqqiinissamut akuersisartunit ullumi akuerineqarpoq.

INI Eqqartuussiviit Qullersaanni akiliisussanngortinneqassaguni, tamanna inissiaatileqatigiiffiup najugaqarfinnut allanut aningaasarpassuarnik akiliisariaqalernissaanik kinguneqarsinnaavoq. INI A/S-ip pisortaa Kenneth H. Jørgensen ima oqarpoq:

-Atertaq pillugu eqqartuussinermi Ini akiliisitaasussanngussaguni soorunami akiliissaaq, kisianni najugaqarfiit allat INI-mik eqqartuussisulersuussissalissappata tamannalu Ini-mut ajornerpaamik kinguneqassappat, taava INI nammineq aningaasatiminit annertunerusumik akiliisariaqalersinnaavoq, Kenneth H. Jørgensen oqarpoq. Ajornerpaamik kinguneqassappat aningaasat 100 million koruunit annaaneqarsinnaanissaat eqqoriarpaa. INI-llu ataatsimeersuarnerani piginnittut naalakkersuisut sinnerlugit neriorsuisimanerarpai INI-ip siunissaata qularnaarneqarnissaanut atatillugu suliniutissanik naalakkersuisut inatsisartunut qinnuteqarumaartut. Atertap saniatigut najugaqarfik alla tassa Narsami najugaqarfik, Atertaq pillugu suliamut assingusumik tunngaveqarluni INI-mik aamma eqqartuussisulersuussivoq. Tassanilu aalajangerneqarpoq najugaqarfiit namminneerlutik eqqartuussisulersuussisuussanngitsut, tassanilu aalajangiineq INI A/S-ip siunissaq eqqarsaatigalugu isumalluarnartoqartikkaa Kenneth H. Jørgensen oqarpoq.

INI A/S-p suliamik Eqqartuussiviit Qullersaannut ingerlatitseqqiinissaminik akuerineqarnerminit sapaatip akunneri sisamat qaangiutsinnagit suliassaq Eqqartuussiviit Qullersaannut tunniutereersimassavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat