INI akileeqqussutinik tusindilippassuarnik nassitsisarpoq

Kisitsisit kingulliit takutippaat, sineriak tamakkerlugu suliat 116-it politiinut januaarimi suliassanngortinneqarsimasut, taakkunanngalu quliinnaat anisitaasut.

Politiit anisitsissagaangamik, anisitaasut  utaqqiisaasumik inissinneqarfissaat qulakkeerneqaraangat aatsaat anisitsisarput.

Innissiaatileqatigiiffimmi INI-mi attartortut, politiinit anisitaannginnerminni akiliinissaminnut arlalinnik periarfissinneqartarput.

Ininik attartortut akiliinngitsut sapaatip akunneri pingasut qaangiukkaangata, allakkamik akileeqqussummik siullermik nassiussiffigineqartartut, inissiaatileqatigiiffimmi attaveqarnermut pisortaagallartup, Berit Frydendalip illisimatitsissutigaa.

- Ineqarnermut akileeqqussutit siullermeertut 2600-it, ukiormanna januaarimi nassiussorneqartut nalunaarsorpagut.

Allagaq siulleq sapaatip akunneri pingasut missaanni qisuariarfigineqanngippat, akileeqqussutit aappaat nassiunneqartarpoq, inimillu attartorneq atorunnaarsinneqartarluni. Taamaattorli akiliilluni najukkap tigummiinnarnissaanut periarfissaqartarluni.

Ineqarnermut akiliut akilerneqarsimanngikkaangat, inissiaatileqatigiiffiup attartortoq nalunaarfigisarpaa suliaq politiinut ingerlateqqinneqartoq. Tamannalu akileeqqussutip aappaata nassiunneqareernerani, sapaatip akunnera qaangiukkaangat pisarpoq.

- Aaappassaanik akileeqqussummik nassinneqartut 200-uinnaasut, Berit Frydendalip oqaatigaa, nangillunilu:

- Taakkunanngalu suliat 116-it politiinut suliassanngortinneqartut, taakkunanngalu 116-init, maannamut qulit anisitaasut, Inissiaatileqatigiiffik A/S INI-mi attaveqarnermut pisortaagallartoq, Berit Frydendal ilisimatitsivoq.

Akiligassat akilerneqanngitsut, INI-p inissiataani suli najugaqartunut ukiormanna januaarimi 15 milliuunit koruuniupput. Kiisalu INI-p inissiaataani najugaqarunnaarsimasut, akiligassaat akilerneqanngitsut 67 milliuunit koruuninit ikinnerunatik.