Ingmar Bergmann toquvoq
Filmiliornermut isiginnaartitsinermullu ilitsersuisartoq svenskeq Ingmar Bergmann 89-inik ukioqarluni toquvoq. Taanna peruttulerami filminik 40-nik isiginnaagassianillu 100-t sinneqartunik ilitsersuisimavoq taakkua saniatigut tv-kkut isiginnaagassiarpassuit aamma ilitsersuisuuffigisimavai. Taamaattorli pingaarnerusumik filminik ilitsersuisartutut nunarsuaq tamakkerlugu tusaamasaavoq. Filminik isornartorsiuisartup Morten Phil-ip sooq Bergmann nunarsuaq tamakkerlugu tusaamasanngornersoq ima oqaluttuaraa.
Pingaarnerpaavoq 1940-kkunni aamma 50-ikkunni soqutigittaatsumik isertuaatsumillu oqariartuuteqartalernera. Tassa kimigiisertumik inuttut oqariartuuteqartarneq inuttaasut misigissutsikkut killissaat tikivillugit, matumani akulerullugit pissanganarsaarineq, annilaanganartuliorneq isumalioriallaqqissuserlu. Aamma assilisatigut takorluuisinnaassuseqarneq, inuit ikittuinnaat piginnaaneqarfigisaat pigaa.
Filmiliornermut qanoq sunniuteqarsimanersoq apeqqutigineqarmat, oqaatigineqarpoq sunniuteqarsimaqisoq, tassami ersersikkamiuk filmini nuannarineqarluartartuni inuttatut ittoorisaqarani “imminut tuniniarsinnaaneq” pingaaruteqarluinnartoq.
Bergmannip filmiliai qimerlooraanni maluginiartariaqarpoq filmiliaritittartut aalajangersimanerusut inuttaritittarai, apeqqutigineqarporlu filmiliaritittartunut qanoq pissuseqarnersoq.
Tassani oqaatigineqarpoq, filmiliaritittartunut paasiuminaatsumik pissuseqartoq. Tassami kamarujussuarsinnaasarpoq filmiliaritittartorlu sussaajunnaarsillugu akerartorlugu. Kingornatigullu pikkorilluinnarluni filmiliaritittartoq utoqqatserfigisarpaa nuannaalerseqqillugulu.
Filmini Bergmann ilaatigut nammineq pineqartarpoq, oqaaserisartagaalu issuarneqarluartartoq tassaavoq, naak nammineq oqaluttuarigaluartutit kinarpiaanerit paasineqassaqqaarpoq. Taava apeqqutigineqarpoq filmini Bergmann inuttut piviusoq naapittarneripput.
Piviusoq eqqortoq tamaat oqaatigisarunanngikkaa oqartoqarpoq, tassami inuit ilaatigut imminut salloqittaarisarput, Bergmannillu tamanna miserratiginavianngikkaa filminik isornartorsiuisartup Morten Philip oqaatigaa.
