Ingiaqateqarsinnaanersut misissortikkusuppaa
Meeqqat 15-it sinnerlugit ukiullit napparsimanerminnut atatillugu nakorsiarlutik angalanerminni angajoqqaaminnik ingiaqateqarsinnaanngitsut, inatsisini atuuttuni allaqqavoq.
Peqqissutsimut naalakkersuisup, ArK'alo Abelsenip tamanna allanngortinneqarsinnaanersoq misissortikkusppaa.
- Tassa malittarisassat malillugit ullumikkut imaappoq, 15-inik ukioqalernissap tungaanut napparsimasoq meeraq, angajoqqaami arlaannik ingiaqateqarsinnaavoq, nakorsiarnerminut atatillugu, Peqqissutsimut naalakkersuisup, ArK'alo Abelsenip inatsit atuuttoq nassuiarpaa. Inatsimmilu anaanasoq meeqqaminik ataasiliineqanngitsumik milutsitsinguni, napparsimaneranullu akornutaanngippat, milutsitaa angalanermi ilangineqarsinnaasoq allaqqavoq.
Inatsilli allanngortinneqannginnerani aporfiusinnaasut qulaajarneqaqqaartariaqarput, assigiinngitsumik sullissisoqalinnginnissaa anguniarlugu.
- Allamik taarsissangaluarutsigu taakku ukiunut killiliussat atorunnaarsillugit, kisiannili ataasiakkaani nakorsat naliliisittarlugit, ilumut napparsimasoq ingiaqateqartariaqarnersoq, 15-inik ukioqalereersimangaluarluni, taava assigiinngiiaartorujussuarmik sinerissami pisoqalissooq, ArK'alo Abelsen oqarpoq.
- Tassa ullumik taakkua malittarisassat atuutsillugot nalunanngittunnguuvoq, assigiiaartorujussuarmillu aaliangiisoqartarluni, kisianni taarserneqaraluarpat, taakkua ukiui aaliangiisuutippallaarunnaarlugit, taava qularnanngittumik, inuit tamatta assigiinnginnatta aamma nakorsat tamarmik assigiinnginnamik, taava naliliisarneq taanna assigiinngiiaartunngussooq sinerissami, ArK'alo Abelsen oqarpoq.
Piareersimavorli atorfilittani peqqissaartumik oqaloqatigissallugit ingiaqateqartarnermut malittarisassat allannguutissaanik siunnersuuteqarsinnaanerluni.
ArK'alo Abelsen oqarpoq.
Nunavumi meeraq angajoqqaaminik ingiaqatigineqassanersoq, nakorsamit aaliangerneqartarpoq.
Norgemi 18-iniilineqanngitsumut angajoqqaap angalaqataanissaa akilerneqartarpoq, meerarlu qulit inorlugit ukioqarpat, angajoqqaavi marluullutik angalaqataanissaat akilerneqartarluni.
Peruluttorli angalalluni nakorsiassanguni, angalanermilu nalaani toqusinnaanera ilimagineqarpat, taava ilaqutaasumik najorneqarnissaa inatsisitigut periarfissaritinneqarpoq.
