Ingerlatseqatigiiffinnut akisussaajunnaarpoq

oktobarip 05-at 2004 12:24

Namminersorneq pillugu naalakkersuisoq Jørgen Væver Johansen, ingerlatseqatigiiffinnut akisussaajunnaarpoq.

 Naalakkersuisut siulittaasuat Hans Enoksen aalajangerpoq, ingerlatseqatigiiffinnut allattoqarfik, Naalakkersuisut siulittaasoqarfianut inissinneqaqqissasoq.

Naalakkersuisut siulittaasuat Hans Enoksen oqaaseqartissinnaasimanngilarput, inatsisartut siulittaasuat Jonathan Motzfeldt peqatigalugu folketingimi ammaanersiornissaq malinnaaffigiartormagu. Naalakkersuisullu siulittaasuata tullia Josef Motzfeldt aamma oqaaseqartissinnaansimanngilarput.

Royal Greenland A/S-imut attaveqarnerup tusagassiorfitsigut aalassassimaarutaanera ilaatigut pissutigalugu pissutsit eqqissisimanerulertariaqartut, Naalakkersuisut siulittaasuat isumaqarpoq.

-Suliffeqarfiutigut inuiaqatigiinnut sulisunullu annertuumik pingaaruteqarput, taamaattumik piginnittut aqutsisullu akornanni suleqatigiilluartoqarnissaa pisariaqarpoq, Hans Enoksen tusagassiuutinut nalunaarummini taama allappoq.

Inatsisartut Naalakkersuisullu pillugit Inatsisartut inatsisaat, aammalu Namminersornerullutik oqartussat inatsisaat naapertorlugit, Naalakkersuisoqarfiit suliassaqarfii agguataarneqartarput, Naalakkersuisut siulittaasuata aalajangersagai naapertorlugit.