Jens B. Frederiksen: Ingerlatseqatigiiffimmi pisortaanerugallartutut sulilertoq

Kommuneqarfik Sermersuup illoqarfimmik ineriartortitsinermi suliniutaa ”Siorarsiorfik – Nuuk City Develoment” maanna ingerlatseqatigiiffittut pilersinneqarpoq, Jens B. Frederiksenilu pisortaanerugallartutut ivertinneqarpoq.
Assi © : Helle Nørregaard
oktobarip 04-at 2017 14:10

Kommuneqarfik Sermersuup septembari aallartittoq kommunimit pigineqartoq illoqarfimmik ineriartortitsinermi ingerlatseqatigiiffik pilersippaa, siorarsiorfiullu illoqarfittut ineriartortinneqarnerinik aningaasalersuineq, ineriartortitsineq, piareersaaneq, sanaartorfissagissaaneq, sanaartorneq ingerlatsinerlu isumagissavai.

Illoqarfimmik ineriartortitsinermi ingerlatseqatigiiffik, NCD maanna pisortatigoortumik pilersinneqarpoq, siulersuisoqalerlunilu pisortaanerugallaqalerpoq.

Siulersuisuni ilaasortat tassaallutik Lars Møller-Sørensen (siulittaasoq), Jess G. Berthelsen, Marie Kathrine Fleischer, Inaluk M Brandt, Karl-Gustav Jensen aamma Mike J Kristiansen.

Jens B. Frederiksen NCD-mi marsip aallaqqaataa 2018-ip tungaanut pisortaanerugallassaaq.

AAMMA ATUARUK Inissiat 1,3 milliardinik nalillit ingerlatseqatigiiffimmut nutaamut nuunneqassasut

Aningaasaqarnermut Inuussutissarsiornermullu Ataatsimiititap tamarmiusup ataatsimiinnermini kingullermi tamanna akuersissutigaa. Jens B. Frederiksen Demokraatini siulittaasuunikuuvoq, aamma Inatsisartuni Naalakkersuisunilu ilaasortaanikuulluni.

Jens B. Frederiksenip politikki 2014-imi qimappaa, True North Gems Greenland A/S-imi aammattaaq Greenland Ruby A/S-imi pisortap tulliatut atorfeqarnikuuvoq.

Jens B. Frederiksen Kalaallit Nunaanni Politiini aamma sulinikuuvoq – ilaatigut vicepolitikommissæriusimalluni.

NCD-mi pisortaanermik atorfinitsitsineq marsip aallaqqaataa 2018 nalinginnaasumik inuttassarsiuunneqarluni allagarsiissutigineqarpoq.

Jens B. Frederiksen sapaatip akunnerani uani sulilerpoq.

AAMMA ATUARUK Illoqarfiup ineriartortinnissaanut pilersaarut aggulunneqartoq