Ingerlatseqatigiiffiit arnanik ilaasortassaminnik qinigassarpassuaqaraluarput
Pisortat ingerlatseqatigiiffiisa siulersuisuini arnat ilaasortat 15 procentiinnaat ilaasortaanerat, naligiissitaanermut siunnersuisooqatigiit naammaginagu maajimi ataatsimiinnerminni naalakkersuisunut saaffiginnissutigigaat, siunnersuisoqatigiiffiup siulittaasuata Agathe Fontainip oqaatigaa.
Naligiissitaanermut naalakkersuisoq, Johan Lund Olsen tamatumunnga oqarpoq, ukiut tamaasa naalakkersuisoqatini kajumissaartarlugit, arnanik siulersuisunut ilaasortassanik toqqaaqqullugit.
Arnat angutillu naligiissitaanissaat pillugu Inatsisartut inatsisaanni nr. 7 11.apriilimeersumi ilaatigut allaqqavoq, siulersuisut, sinniisoqarfiit imaluunniit ataatsimoortumik siulersuiffiit, Naalakkersuisut ilaasortaatitassanik toqqaavigisartagaat angutinik arnanillu tamarmik sapinngisamik amerlaqatigiinnik ilaasortaqartassasut.
Johan Lund Olsen oqarpoq, sapinngisamik amerlaqatigiinnissaannik inatsimmi allaqqammat, peqqussutiginagu kajumissaarutigiinnarsinnaallugut.
Naligiissitaanissamut siunnersuisooqatigiit siulittaasuata Agathe Fontainip oqaatigaa, arnat siulersuisuni ilaasortassatut toqqarneqarnissaminnut piukkunnartut atii 70-it missaanniittut allattoqarfimmut nassiuttakkatik nutarterneqartuaannartut.
Johan Lund Olsen oqarpoq sulinngiffeqarluni angerlaruni atit taakku misissoqqissaarniarlugit, taamaalilluni aappaagu siulersuisunut qinersisoqaqqinnissaanut piareersimaffiginiassagamigit.
Johan Lund Olsenip aamma eqqumaffigisariaqarnerarpaa, piginneqatigiilluni ingerlatseqatigiiffiit, siulersuisuisunut ilaasortassaminik naalakkersuisunut innersuussuteqaraangamik arnanik piukkutaminnik tikkuagaqarneq ajornerat.
Ingerlatseqatigiiffiit siulersuisuminni arnanik ilaasortaqanngitsut, ilaatigut tassaapput: Air Greenland, Greenland Venture, Nuna Minerals, Nuna Oil, Royal Arctic Line kiisalu Tele Greenland.
