Ingerlatseqatigiiffiit aatsitassarsiornermi pitsaanerulersitsinissamut suleqataarusuttut

Nunarput aatsitassarsiortunut pilerinarnerulertinniarlugu suleqatigiinnissaq Tanbreezimit GME-miillu kaammattuugineqarpoq.

Nunarput aatsitassarsiortunut pilerinannginnerulersimasoq, Fraser Institutep 2016-imut ukiumoortumik misissuinerani takuneqarsinnaavoq. Qaffasinnerusumullu inisseqqissagutta aatsitassarsiorniartut atugassarissaarnerusariaqartut, Tanbreezimit GME-miillu isumaqartoqarpoq.

- Siuariaataasunik takussutissaqarrnissaata tungaanut Kalaallit Nunaat allattorsimaffimmi taama ittumi qeqqata missaani inissisimaannassasoraara, GME-mi pisortaq, John Mair, KNR-imut allappoq.

Fraser Institutep nunat aatsitassarsiornissamut aningaasaliiffigisassatut pilerigineqarnerpaanik tulleriiaarinerani Nunarput arfineq-aappaattut 2013-imi inissisimasinnarluni, siorna 55-iattut inissippoq.

Pingaartumillu Nunatsinni akileraartarnermut aaqqissuussinermut, sulisoqarnermut malittarisassanut politikkikkullu ingerlatsinermut tunngasut 2015-imut naleqqiullugu ajornerusumik nalilerneqarsimasut, institutip nalunaarusiaani takuneqarsinnaavoq.

Isornartorsiutinullu tusarnaarnissaq pingaaruteqartoq, ujarassiooq Ole Christiansen Sulisitsisullu isumaqarput.

Sullissinermilu ajornartorsiuteqartoq aatsitassarsiornermik ingerlateqatigiiffimmi Tanbreezimeersoq, Greg Barnes isumaqarpoq.

- Pisariaqanngitsumik allaffissorneq qangalili ajornartorsiutaasoraara, Greg Barnes oqarpoq.

Aatsitassarsiornermulli naalakkersuisup, Múte Bourup Egedep, sullissinermut tunngasunik misissuilluni oqaatigereerpaa, tamannalu Greg Barnesip nersualaarpaa.

Barnesillu Nunarput allattorsimaffimmi qaffasinnerusumut inisseqqissasoraa.

- Pisariaqanngitsumik allaffissornermut tunngasut aaqqiivigineqarsinnaappata, aatsitassarsiortunullu allatigut orniginarnerulersitsisoqarsinnaappat, Kalaallit Nunaat qaffasinnerulissasoraara, Greg Barnes oqarpoq.

GME-meersorli John Mair isumaqarpoq, Nunatta ilaatigut attaveqatigiinnermut atortulersuutitigut unammillernartoqarnera pissutigalugu aningaasaliisartut Nunatsinni ajutooratarsinnaasut, tamatumuunalu naammattumik tapersersorneqanngitsut.

Naalakkersuisullu allanngorarnerat iluaqutaanngilaq.

- Taamaasilluni assigiiaartumik aqutsisoqanngilaq, tamannalu atorfissaqartupilussuugaluarpoq, John Mair allappoq.

Ajornartorsiutitulli Fraser Institutep nalunaarusiaani uparuarneqartut aaqqiiviginiarneqassappata, Nunatta allattorsimaffimmi appasissorujussuarmut inissinnera piffissami ungasinnerusumut iluaqutaasinnaasoq, John Mair isumaqarpoq. Tamatta ikioqatigiilluta pissutsinik pitsanngorsaasinnaavugut, allappoq.

Aatsitassarsiortullu aamma akisussaaffeqartut, Greg Barnesip oqaatigaa.

- Suleqatigiilluta Fraser Institutep allattorsimaffiani inissisimaffigisassaanut inissitinniarsinnaavarput. Tassalu qaffasinnerpaat qulit akornanni, Greg Barnes oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat