Ingerlaannarumallutik piginneqataassutit tunivaat

Qeqertaq Fiship unammilleqatigiinnermi sakkortuumi siunissami ingerlaannarnissaa qularnaarniarlugu piginneqataassutsit Royal Greenlandimut tunineqartut, siulersuisuni siulittaasuusimasup Erik Nielsenip maanna oqariartuutigaa. Taassuma Halibut Greenlandip uparuaateqarnera paasiuminaatsippaa, tassami taakku siullertut suleqatiserineqaqqaarsimammata.

- Ilaatigut suleqatissarsiornitsinnut taanna allaaviulluinnarpoq, akit qaffasippallaarnerujussui piffissaq ungasinnerusoq isigalugu nammassinnaanngittutut nalileqqagatsigut, Qeqertaq Fishimi siulersuisuni siulittaasuusimasoq Erik Nielsen oqarpoq.

Qeqertaq Fishillu unammilleqatigiinnermi sakkortuumi siunissaa qularnaarneqarpoq, Royal Greenlandip piginneqataassutsinik amerlanerussuteqartunik pisineratigut, tamatumalu Halibut Greenlandimit uparuarneqarnera, Erik Nielsenip paasiuminaatsippaa, tassami Halibut Greenland suleqatissatut piukkunneqarluni siullertut saaffigineqarsimagaluarmat.

- Marloriarlugit, taavalu aamma taassuma kingornatigut tuniniaaqatitta piginneqatitta ilaata aamma nammineerluni aamma saaffiginikuusimagaluarpai, suleqatigiinnissaq aallaavigalugu imaluunniit tuniniaaneq aallaavigalugu oqaloqatiginissaannut, kisianni qisuariartoqarsimanngilaq, Erik Nielsen oqarpoq.

Halibut Greenlandip pisortaata Qeqertaq Fishimi piginneqataasut Kangaamiut Seafood oqaloqatgineqarsimasut nassuiaatigaa, piginneqataassutsinilli pisinissamut tunngavissaqarsorisimanngillat.

Pisortap Niels Thomsenip pisortat suliffeqarfiutaata akileraartartut akileraarutaat tunuliaqutaralugit suliffeqarfinni namminersortuni piginneqataassutsinik pisiortornermigut unammilleqatigiinnermik ipititsiniaanera suli uparuartortuarsinnarpaa, politikkikkullu oqallinneq suli amigaataalluinnertutut nalilerlugu.

- Nipangersimaaginnarunnaarlutik isummersortariaqarput qulequtaq taanna qanoruna isummersorfiginiarneqarnersoq. Inuiaqatigiinni tunngaviusumik isummerfigineqartariaqarpoq pisortat pigisaat namminersortut pigisaannut unammillertuusassanersut? Pisortaq Niels Thomsen oqarpoq.

Demokraatit Qaasuitsup kommuniani kommunalbestyrelsemut ilaasortaatitaat periuserineqartoq tujormigaa, pisortallu suliffeqarfiutaannut malittarisassat amigaataasoralugit.

- Isumaqarpunga  malittarisassat ersarissut amigaatigineqartut. Uani niuernermi nukiit kisiisa isiginagit, kisianni inuiaqatigiinnut ungasinnerusoq eqqarsaatigalugu pitsaanerpaamik qanoruna ingerlatsiniartoqartoq, Ane Lone Bagger oqarpoq.

Erseqqissaatigaa malittarisassat qulakkeertariaqaraat pisortat suliffeqarfiutaasa suliffeqarfiit namminersortut unammilleqatigiiffigisaanni ipititsiniaannginnissaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat