Ingeniørit Kuannersuarnik nalilersuisut isornartorsiorneqarnertik akissuteqarfigaat
Suliffeqarfik Orbicon aatsitassarsiorfissanik angisuunik pilersaarutigineqartunik avatangiisinik nalilersuitinneqartartoq, pipallatanik suliaqartarnerarlugu, Avattami siulittaasoq Mikkel Myrup sapaatip akunnerani kingullermi Radioaviisimut oqarpoq.
- Kuannersuarni piiaanermi sinnikut isumannaatsumik qanoq katersorneqartassanersut, Orbiconimit oqaatigineqanngilaq, Mikkel Myrup oqarpoq.
Tamatuma saniatigut pilersaarutinut Isukasianut aamma Killavaat Alannguannut tunngatillugu, aatsitassat isumannaatsumik akisussaassuseqartumillu piiarneqarsinnaanerannik qularunnaarsinneqarnani, avatangiisinik illersuiniartup taassuma oqaatigaa.
Orbiconimeersut radiukkut apersorneqarnissartik kissaatiginngilaat, allakkatigulli oqaaseqaatiminik nassiussaqarlutik.
Myrupip isornartorsiuineranut Per Møller-Jensen akissuteqarluni oqarpoq, Kuannersuarni pilersaarutinut atatillugu Orbicon avatangiisinut inaarutaasumik suli suliaqanngitsoq, taamaallaat misissueqqaarnernut tunngasunik suliaqartoq.
- Isukasiani aamma Killavaat Alannguanni pilersaarutinut atatillugu, avatangiisinut kingunerisassaasa nalilersornerini najoqqutassat, Aatsitassanut ikummatissanullu qullersaqarfiup suliarisimasai maleqqissaarpavut, Orbiconimi immikkoortortami pisortaq taanna oqarpoq.
- Piffissami matumani Isukasianut pilersaarutinut nalilersuinerit kisimik oqartussanit akuerineqareerput, Killavaalli Alannguannut pilersaarutinut atatillugu tusarniaanerit naammassingajalerput, taamalu oqartussanit suli akuersissuteqarfigineqaratik, Per Møller-Jensen Radioaviisimut oqarpoq.
Orbiconip akissutaani Avattamit isornartorsiuinerit ilaat, tassa avatangiisinik nalilersuinerni suminngaanneernerinik oqaatigineqanngitsunik kopeeriinnartoqartarsimanera oqaaseqarfigineqanngilaq.
Kuannersuarni pilersaarutinut tunngatillugu avatangiisit pillugit nalunaarusiaq, Hollandimiumit avatangiisinut nukissiuuteqarnernullu nalilersuinermut immikkut ilisimasalimmit Jan Willem Storm van Leeuwen-imit isornartorsiuisumik allagaasoq, apriilip naalernerani saqqummerspoq. Tamatumani isornartorsiorneqartut annersaralugu, pujoralaat piiaaffimmi ujaqqaneersut aatsitassaneersullu isumannaatsumik katersorneqarnissaannut aaqqiissutissamik suli nassaartoqarsimannginnera.