InfoBoard ullumi atoqqaarfissiorneqassaaq
Kommunip tamanna iliuuseqarfiginiarlugu, internetikkut allagarsiiviit, InfoBoardimik taaneqartartut, Tasiilami, Paamiuni Nuummilu ualeru nalunaaqutaq marlunut ataatsikkut atulersinniarpai.
Illoqarfinni, tamanit orninneqartartuni, kommunit allagarsiivinnik atuisaraluarput - internetikkulli allagarsiiviit, InfoBoardit, nittartakkamit aqunneqartut, skærmersuartigut, Nuummi qitiusumit aqunneqartut, maanna takuneqarsinnaalissapput.
- Innuttaasut ilarpassui interneteqanngimmata, innuttaasut skærmersuit iluaqutigalugit kommunimit paasissutissinneqartarnissaat qulakkeerniarneqarpoq. Aamma illoqarfinni ataasiakkaani paasissutissat skærmikkut takuneqarsinnaassapput, Kommuneqarfik Sermersuumi paasissutissiinermut pisortaq, Káte Hansen, oqarpoq.
Kommuneqarfik Sermersuumi illoqarfinni nunaqarfinnilu tamani InfoBoardit siunissami atuutilernissaat siunertaavoq. Maannamulli illoqarfinni pingasuni misiliutigalugu atuutsinneqalissapput.
Skærmersuit Nuummi Paamiunilu Brugsenimi aamma Tasiilami Pilersuisumi atuutilersinneqassapput.
