Inerteqqut tassanngaannartumik eqquteqqunngilaat

Akunnittarfinni neriniartarfinnilu pujortarneq oktobarip aallaqqaataaniit aamma inerteqqutaalissaaq, tamanna akunnittarfiutillit neriniartarfiutillillu pitsaasumik kinguneqarsinnaasorinngilaat. Inatsisip atuutilernissaanut ukiuni marlunni pingasuniluunniit ikaarsaarfeqalernissaa, ujartorpaat.
Allattoq Jens Thorin
marsip 22-at 2010 12:45

- Inatsit ajornartorsiuterpassuarnik malitseqassaaq, inatsisiliunnginnermi eqqarsaatigineqartariaqartunik, Hotel Hans Egedemi Nuummiittumi pisortaq Helge Tang oqarpoq. Taanna Kalaallit Nunaanni sulisitsisut Peqatigiiffiata ataani akunnittarfiutillit aamma neriniartarfiutillit siulittaasoraat.

Neriniartarfinni, kafeteriani, cafeni grillbarinilu pujortarnissap inerteqqutaalernissaa Helge Tangip isumatut pitsaasutut isigaa, inuusuttut tamakkununnga orniguttarmata, inuusuttullu pujortarnermut pissuseqarfiginninnerat allanngortinneqarsinnaammat.

- Kisianni imerniartarfinni, 18-ileereersimasut ornittagaanni, pujortarnermik inerteqquteqalernissaq pitsaasutut isiginngilarput. Nunammi inuisa 70 procentii sinnerlugit pujortartartuusut nassuerutigisariaqarparput. Inerteqqutip tallimanngornerup arfininngornerullu unnuaani atuutsinnissaa ajornakusuussaqaaq, Helge Tang oqarpoq.

Tassalu pujortarnermut inerteqqutip malitsinnissaa neriniartarfiutillip akisussaaffigaa. Malinneqanngippat neriniartarfiutillip politiit aggersartussaavai. Tamaaliunngikkuni akiliisitaassaq.

Neriniartarfiliutillit imerniartarfiutillillu kisssaatigigaluarpaat, inatsisip atuutilernissaanut ukiuni marlunni pingasuniluunniit ikarsaariarfeqassasoq. Tamannali itigartitsissutigineqarsimavoq.

Pujortartarneq pillugu inatsisissap atuutilernissaanut, ingammik unnuakkut imerniartarfiit qitigiartarfiillu eqqarsaatigalugit, sivisunerusumik ikaarsariarfeqarnissaa anguniarlugu, Helge Tangip politikerit suli sunniiniarniarfigai.

Ilinniartitsivinni meeqqerivinnilu tamani pujortartarneq unitsinneqassaaq. Ulluunerani angerlarsimaffimminni meeqqanik paaqqinnittartut aammattaaq pujortaqqusaajunnaassapput. Tamanna aamma kollegiami najugalinnut atuutissaaq. Bussini, taxani, imerniartarfinni neriniartarfinnilu pujortarneq inerteqqutaalissaaq. Aammattaaq imaatigut angalallutit pujortarniaruit silamut anisariaqartassaatit, inatsimmilu nalinginnaanngitsorujussuarmik aammattaaq peqatigiiffinni namminersortuni klubbinilu pujortarneq inerteqqutaalissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq