Inersimasut quliugaangata ataaseq sukkulersimasarpoq

Marit Eika Jørgensen innuttaasut peqqissusaannik misissuisarfimmeersoq taama oqarpoq.

- Type 2-mik diabeteseqartut - sukkornermik nappaateqartut - amerliartornerannik ukioq 2000-p missaani paasisaqarnerput, miisissuinitta kingulliup aamma uppernarsarpaa, Marit Eika Jørgensen oqarpoq.

Taanna innuttaasut peqqissusaannik misissuisarfimmi Danmarkimiittumi ilisimatuujuvoq.

Marit Eika Jørgensen oqarpoq, kinguaariinni kingullerni diabetes 2-mik nappaateqartut amerleriarujussuarsimasut.

- Innuttaasunik misissuinitsinni paasivarput, Kalaallit Nunaanni inersimasut 10 procentii type 2-mik diabetes-imik nappaateqartut.

Kalaallit type 2 diabetesseqartut amerleriarujussuarnerat, nunarsuarmiut allat assigalugit inooriaatsiminnik allannguisimanermik peqquteqarpoq.

- Timerput atorlugu sulisariaqartarunnaarnikuuvugut, nerisassarpassuit assigiinngitsut toqqarneqarsinnaalernikuupput, aamma Kalaallit Nunaanni amerlingaluttuinnartunik nioqqutissaqarpoq, nunanilu killernerneersunik nerisassanik peqqinnarpallaanngitsunik nerisaqartalersimapput.

Marit Eika Jørgensen nangilluni oqarpoq, diabetessertut amerliartornerujussuannut pissutaasinnaasoq, kalaallit inuiannnut allanut naleqqiullutik kingornuttakkamik diabetessilernissamut qaninnerummata.

Tassami ilisimatuut eqqoriarpaat, kalaallit iluaqutigisaraat naaminni orsoqalersinnaaneq, nerisassaalatsiffimmi iluaqusissartik. Maannakkulli inuuniarneq taama sakkortutigiunnaarpoq.

- Taava oqartoqarsinnaavoq, kinguariissutsikkut timip pigeriigaanik iluaquteqarsimagaanni, taava iluaqut taanna siulinit pissarsiaq nunani killernisut inooriaaseqalernermi puallajanissamut qanillisaataasimasoq, taamatumalu kingunerisaanik insuliinimut malussajajunnaarneq taamalu aamma qaquguugaluartukkulluunniit diabetessilernissaq qaninnerulerluni.

Taamaammat diabeteseqalernaveersaarnissamut ilisimatooq piuminartunik siunnersuutissaqarpoq:

- Oqariartuut paasinartorujussuuvoq, tassa timip qaqugukkulluunniit atorluartarnissaa siunersuutigisinnaavarput. Ulluinnarni timersortarnissaq inuunermi ilannguttariaqarpoq. Aamma allanngorartunik nerisaqarnissaq pisariaqarpoq, nerisassallu kalooriaqarpallaat ilanngunnaveersaartarlugit. Tassa timip atorneranut naleqquttumik nerisaqarnissaq pisariaqarpoq.