Inersimasut ilinniarnertuunngorsinnaanerat periarfissinniaraat
Nunatsinni inersimasut aamma ilinniarnertuunngorsinnaasariaqarput.
Tamannalu ilinniartitaanermut Naalakkersuisup Tommy Marøp Kanukokamilu siulittaasup Lars Karl Jensenip anguniarumallugu iliuusissatut pilersaarusiortoqarnissaa suliniutigaat.
Taama iliuuseqarnikkut sinerissami atuarfippassuarni ilinniartitsisussaaleqisarneq annikilllisinniarneqarpoq.
Ilinniartitsisussaaleqinerup qanoq ililluni qaangerneqarnissaanut iliuusissatut pilersaarusiornissamik sullissiveqarfiit assigiinngitsut saqqummiusseqqullugit piumaffigineqassasut, Tommy Marø Lars Karl Jensenilu qanittukkut ataatsimeeqatigiinerminni aalajangerput.
Ilinniarfissuaq, Inerisaavik Ilinniartitaanermullu Pisortaqarfik ukiup affaani tulliuttumi iliuusissatut pilersaarusiussapput, tamannalu sioqqullugu sinerissami ilinniartitsisussaaleqinerup qanoq annertutiginera misissuiffigineqassaaq.
Misissuineq tunngavigalugu atuartitsisut tiguinnakkat ilinniartitsisunngorniarnissamut periarfissinneqarsinnaanerat nalilersuiffigineqassaaq.
Ilinniartitsisussaaleqineq pillugu misissuinissamut nunatsinni ilinniartitsisutut ilinniarsimasunik 400-inik amigaateqarnerput tunngaviuvoq.
