Inersimasut Danmarkimi kalaallisut ilinniarusuttorpassuusarput

Kalaallit oqaasiinik aallarterlaanut ilinniartitsineq Studieskolemi Københavnimiittumi soqutigineqarluarpoq.
aggustip 19-at 2010 15:13

Studieskole ukiumut marloriarluni kalaallit oqaasiinik pikkorissartitsisarpoq. Christoph Schepers, Studieskolemi ilinniartitsisuusoq ima oqarpoq:

- Ukiumut marloriarluta pikkorissartitsisarpugut naliginaasumillu agguaqatigiisillugu inuit 30-it 50-illu missaani peqataasarput. 20-it missaanniittut aallarterlaajusarput sinnerilu 30-it tungaanoortut ingerlaqqittuusarlutik ukiut arlallit peqataasareersimasut, Christoph Schepers oqarpoq.

Kalaallit Danmarkimi najugaqavissut pikkorissartitsinermut naliginaasumik peqataaniarlutik nalunaarneq ajorput - taamaakkaluartoq Studieskolep kalaallisut qaffasissumik ilinniartitsinissaq ingerlakkusuppaa.

- Kalaallit Danmarkimi najugaqavissut ilaat saaffiginninikuugaluarput. Taakku oqaatsimik ilaat puigorsimasarpaat. taamaakkaluartoq pikkorissartitsisarnitsinnut peqataatissallugit pikkorippallaartarput immikkullu pikkorissartissallugit ikippallaarlutik. Qaffasissumik ilinniartitsinissamut neqerooruteqarnikuugaluarpugut, kisiannili peqataaniarlutik naluaartut ikippallaarsimapput. Taakku assut aalluterusukkaluarpakka assersuutigalugu kalaallit illuat suleqatigalugu. Maannakkuugallartumulli immaqa inuk ataasiinnaq peqataaniarluni nalunaarsimaammat pikkorissarnerit aallartissallugit ikippallaaqaat. Maannakkulli septemberimi aallarterlaanut pikkorissartitsinissagut ulikkaaqqapput, Christoph Schepers oqarpoq.