Inersimasut akornanni nakkarsaasarneq oqallisigilluarneqarpoq
Ilulissani kulturikkut illu Sermermiut saqqummiussiffigineqartoq ornigarneqarluarpoq. Inuimmi 60-it tungaannut aaqqissuussamut tusarnaariarlutik ornigupput. Aaqqissuussamut saqqummiisuuvoq Qaasuitsup Kommuniani kulturimut sunngiffimmullu immikkoortortaqarfimmi ataqatigiissaarisoq Markus E. Olsen.
Taassuma nunaqqatigiinni nakkarsaattarneq, ingutsisarneq aamma qinngasaarisarneq qanoq iliuuseqarfigerusuppaa. Tusarnaariartunullu saqqummiinermini oqaluttuanik nutarpasissunik kiisalu oqaluttuatoqqani biibilimilu nakkarsaasarnermut sinnganermullu oqaluttuanik assersuuteqartarluni saqqummiussaqarpoq.
Tusarnaariartullu ilaasa meeraalluni nakkarsarneqartarsimagami, tusarnaariarnissani soqutiginartissimavaa:
- Tassa uannut pingaaruteqarami taanna. Peqqutigalugu nakkarsagaasarnikuungama folkeskolemi atuarallama meeraallunga. Qujanartumilli ineriartorninni akiniutinik peqarnikuusimanngilanga. Aamma taakkua taamaaliortartut isumakkeerfiginikuusimavakka, Arnold Kristiansen oqarpoq.
Markus E. Olsenip “Nakkarsaaneq unitsilli!”-imik qulequtserlugu saqqummiussinermini ilaatigut siunertarivaa inuit akornanni nakkarsaasarnerup ingutsisarnerullu eqqartorneqarnerunissaa. Tamatumunngalu Arnold Kristiansen isumaqataavoq:
- Assut suleqataarusuppunga. Aamma isuma kusanarpoq. Aamma peqqinnartuuvoq. Nakkarsaasarnermi suli ullumikkut tikillugu takussaajuartarami, Arnold Kristiansen oqarpoq.
Markus E. Olsen saqqummiussereermat quiasaarisartoq Piitannguaq Alaufesen aamma Sikkersoq Mathæussen tusarnaarianut aliikkusersuillatsiarput.
Unnuk naggataarlugu tusarnaariat nerrivikkaarlutik qulequttanik sisamanik eqqartuisinneqarput.
Tusarnaariaqataasoq alla Makkak Jørgensen isumaqarpoq aaqqissuussaq pitsaasuusoq, aammalu allamik qulequtserlugu ingerlateqqinneqarsinnaasoq:
- Aap, isumaqarpunga qulequtaq allanngorlugu, orniginarnerusumik nunaqqatigiittut iluliarmiut peqatigiiffiliorsinnaangaluartugut. Soorlu "Nunaga Ilulissat asasara". Taamaalilluni iliuuseqarusunneq nuannersoq tassani pineqarsinnaammat, Makkak Jørgensen oqarpoq.
