Inersimasut affaat pualavallaarput
Allornernik kisitsissutit maanna napparsimaveqarfinnut tamanut nassiussuunneqareersimalerput. Taakku atorlugit pualavallaalersimasut timigissarnerulernissamut kajumilersinniarneqassapput.
Nunatsinni peqqissuunissamut pualavallaalersarneq ajornartorsiutit annerit ilagaat, tamanna Inuunerissasut Nuummi Dronning Ingridip napparsimavissuani sulisut naqissuserpaat. Nunatsinni inuttaasuni inersimasut affaannit amerlanerit pualavallaarput aatsaallu taama amerlatigisut inooriaatsimik tunngaveqartumik napparsimasalerput.
Pualavallaalersarnerullu akiorniarnerani Inuunerissaasut immikkulaaq alloriarput. Tassami maanna allornernik kisitsissutit nakorsamit allagartalerneqarnikkut pissarsiarineqarsinnaalerput.
- Allornernik kisitsissutit nakorsamit allagartalerneqarnikkut pissarsiarineqarsinnaanngornerannut tamatuminnga atuinerup amerlasuunit nuannarineqarnera kajumissaataaneralu patsisaapput. Allornernik kisitsissuteqarnikkut eqqumaffiginninnerulerneq pissutigalugu allornerit amerlisarput, taama oqarpoq inuunerissaasoq suliniummullu tamatumunnga aqutsisuusoq nakorsaq Michael Lynge Pedersen.
Ilisimatusarnikkut paasineqarpoq timigissartarnikkut inuuneq ukiualunnik sivitsorneqarsinnaasoq aammalu inooriaatsimik tunngaveqartumik nappaatit soorlu uummallunneq pinaveersimatinneqarsinnaasut.
Taamaammat Inuunerissaasut innuttaasut timigissartanissamut kajumilersinniarnissaat annertunerusumik sulissutigilerpaat.
Allornernik kisitsissutit atorneraat misilittagaqarfigineqareerpoq 2009-mi nuna tamakkerlugu unammisitsisoqarmat suliffeqarfiit arlallit peqataaffigisaannik. Tassani paasineqarpoq allornernik kisitsissutit timigissarnerunissamut kajumilersitseqataasartut.
- Peqqissuunissap pitsaaliuinerullu peqqinnissaqarfimmi sullissinernut annertunerusumik ilaatinneqarnissaat suliniutigaakka. Allornernik kisitsissutit nakorsamit allagartalerneqarnikkut pissarsiassanngornerat, innuttaasut ataasiakkaat peqqinnarnerusumik inuuneqarnissaannut peqqinnissaqarfiup kajumissaarisinnaaneranut assersuutissaqqissuuvoq, Peqqissutsimut Naalakkersuisoq Agathe Fontain oqarpoq.