Inersimasunngornerminni ikorfartorneqarnissaq pisariaqartippaat
Karl Andersen, 28-nik ukioqartoq Ilulissani isumasioqatigiittoqarnerani oqalugiartunut ilaavoq. Taassuma meeqqat angerlarsimaffianni peroriartornini ilinniarnini ikorfartortinninilu oqaluttuarai.
- Børnehjemmimiinnikut ikiugassaanerusarpugut, tassa artornartunik nassataqaratta. Tassami imminut tatiginani qimagukkaanni artornarnerusumik naapitsinissaq qaninnerusarpoq, taamaattumik ikorfartorneqarnissaq pingaaruteqartorujussuuvoq, Karl Andersen oqarpoq.
Meeqqat angerlarsimaffianni peroriartortut ilinniarnermik naammassinissaata tungaanut meeqqat angerlarsimaffiannut attaveqartuarnissaat qanoq pingaaruteqartigisoq oqaluttuaraa.
- Ilinniarnera naammassigakku tanngassimaarutigineqarlungalu nuannaarutigineqarlunga misigivunga. Meeqqat angerlarsimaffiannut uterpunga suliartorlunga, tassanilu ilinniakkannut tunngasumik suliffissarsiorninni siunnersorneqarnissara pisariaqartissimavara. Massakkullu suliffittaarlunga aallalerpunga tassalu namminiilertussaallunga, Karl Andersen oqarpoq.
Meeqqat inuusuttullu meeqqat angerlarsimaffianneereernerisa kingorna ikorfartorneqartarnissaat pillugu isumasioqatigiinneq Ilulissani Arctic Hotelimi ullumi aqagulu ingerlanneqarpoq.