Inernerit aalajangerpaat: Præsidenti Afghanistanimi qinersinermi ajugaavoq
Afghanistanimi præsidentimut qinersinermi inernerit saqqummiunneqarnissaat qaammatit sisamat sinnerlugit utaqqimaarneqareersullu Ashraf Ghani qinersinermi ajugaaqqartoq, qinersinermut ataatsimiititaliap arlaannaannulluunniit attuumassuteqanngitsup marlunngornermi nalunaarutigaa.
Afghanistanip præsidentia, Ashraf Ghani, qinersisut 50,64 procentiinit qinerneqartoq, qinersinermut ataatsimiititaliap ilisimatitsissutigaa.
Ghanisip septembarip ulluisa 28-anni qinersinermi unammillertaa, Abdullah Abdullah, Ghanimut 2014-imi qinersinermi aamma ajorsarpoq.
Qinersinermi teknikkikkut ajornartorsiortoqarpoq, pissusissamisuunngitsoqarpoq nakuusertoqarlunilu.
Qinersinerup inernerigallagaasa Ghani 50,64 procentinit taaguunneqartoq Abdullah Abdullah-lu 39,52 procentinit taaguunneqartoq takutikkaat, qinersinermut ataatsimiititaliarsuup decembarimi nalunaarutigaa.
AAMMA ATUARUK Afghanistanimi meeqqat millionilikkaat ikiorasuarneqartariaqartut
Abdullah-p allaffeqarfiata inerneri assortorniarlugit taamani oqaluttuaraa, inernerili naammassinerisa marlunngornermi saqqummerneranni assingusumik saqqummertoqarpoq.
Ashraf Ghanilu islamimiut pikisitsiniat, Talibanit isumaqatigiinniarnissamut pilersaarutaasuni isumaqatigiinniartussaarpasilerpoq.
Isumaqatigiinniarneq USA-p Talibanillu eqqisseqatigiinnissamut isumaqatigiissut piffissami sivisuumi suliarineqalertortoq amerikamiullu sakkutuuisa amerlanerpaartaasa tunuarternissaannik ilaqartoq atsiussagunikku pissaaq.
Kabulimili Abdullah Abdullah-p præsidentillu tullersortaata, Abdul Rashid Dostumip naalakkersuisunik immikkoortunik pilersitsinissaminnik siorasaaruteqarnerani eqqissiviilliortoqarpoq.
Pissusissaanngitsumik iliortoqarnera pissutigalugu taasinerit millioningajaat taamaatiinnarneqarput. Tamanna pissutigalugu qinersinermi peqataasut afghanistanimi qinersisoqartarnerani ikinninnguupput.
Afghanistanip innuttaasut 35 millioninik missiliorpai taakkunannga 9,6 millionit qinersisartutut nalunaarsorsimapput.