Ineriartortitsinissamut aningaasaateqarfik suliffeqarfinnut tapersersuisinnaavoq
- Qallunaat naalagaaffianni ineriartortitsinermut aningaasaateqarfiup Nunatsinni atuutilernissaa, uagut illersorparput, Siumut sinnerlugu Folketingimut qineqqusaartoq, Pitsi Høegh, Folketingimut qineqqusaartut qallunaatut KNR-tv-kkut apeqqarissaarfigineqarneranni oqarpoq.
Suliffeqarfiilli Nunatsinneersut Vækstfondenimit aningaasaliiffigineqarnissaat periarfissaareerpoq. Suliffeqarfiillu Nunatsinneersut, Danmarkimi suliffeqarfiit assigalugit qinnuteqarsinnaalereersut, aningaasaateqarfiup pisortaa, Christian Motzfeldt nassuiaavoq.
- Assigiinngissutituaa tassatuaavoq, suliffeqarfiup Greenland Venturep Kalaallit Nunaanni suliffeqarfinnik ilisimasaqarnissaa, nalilersueqatigalutalu, Christian Motzfeldt oqarpoq.
Suliffeqarfiit alliartortut
Suliffeqarfeeraq aningaasaliissutissanik amigaateqarpat, aningaaserivimmillu aningaasanik atortinneqarsinnaanngippat, Vækstfonden aningaasanik qularnaveeqqusiisinnaavoq, taamaalilluni suliffeqarfeeqqap aningaaserivimmit atortinneqarsinnaanera qulakkeerneqarluni.
Aningaasat tamassumunnga atorneqarsinnaasut, 30 millionit koruunit missaanniipput.
Vækstfonden Greenland Venture peqatigalugu, suliffeqarfiit ineriartortinneqarnissaannut aamma aningaasaliisinnaavoq, tassungalu aningaasaliissutit killeqanngillat.
Suliffeqarfiit ineriartortitsinissamut pilersaaruteqarnissaat, isertitaqarluarnissaminnullu pitsaasumik pilersaaruteqarnissaat alliartornissamullu piumassuseqarnissaat, Vækstfondenip aningaasaliinissaminut piumasaqaatigai.
Aatsitassarsiornermi aningaasaliisinnaapput
Folketingimut qineqqusaartut ataasinngormat apeqqarissaarfigineqarneranni qineqqusaartoq, Pitsi Høegh oqarpoq, Vækstfondenip aningaasaliissutai ilaatigut mittarfinnut, umiarsualivinnut sanaartornernullu atorneqarsinnaasut.
Vækstfondenilli aningaasaliissutigisartagaat tamakkununnga atugassiaanngitsut, Christian Motzfeldt nassuiaavoq.
- Taakkununnga aningaasaliinissatsinnut maannakkorpiaq piginnaatitaaffeqanngilagut. Soorluttaaq Danmarkimi nunap atortulersugaaneranut aamma aningaasaliisinnaatitaanata, Christian Motzfeldt oqarpoq.
Pitsi Høeghip apeqqarissaarnermi aamma oqaatigaa, Vækstfondenimit aningaasaliissutit aatsitassarsiornermut atorneqarsinnaasut.
Taamaaliortoqarsinnaasorlu, Christian Motzfeldt uppernarsaavoq.
- Taamaasiorluartoqarsinnaavoq. Suliffeqarfik aatsitassarsiortoq, suliffeqarfiusinnaavoq alliartortoq. Suliffeqarfik Nuup kujataani nunaqarfimmi Qeqertarsuatsiaani rubininik qalluilluni aallartippat, taava suliffeqarfiussaaq alliartortoq, tamannalu tassa siunertaraarput, Aningaasaateqarfiup, Vækstfondenip pisortaa, Christian Motzfeldt oqarpoq.
