Ineqartut kattuffiat makeqqippoq
Inissiarpassuit aserfallakkiartorfianni ineqartut kattuffeqarnissaat pisariaqarpoq, tassami kattuffik nukittooq aqqutigalugu ajornartorsiutit soorlu oqummut tunngasut, inigisamut akiliutit qaffakkiartornerat allarpassuillu ineqarnermut tunngasut sammineqarsinnaammata.
- Ataatsimeersuarnermut peqataanissannut qilanaartorujussuuvunga. Attartortut ataatsimut isigalugit ulluinnarni pitsaanerusunik atugaqalersinnaanerinut, aammalu suut aallaqqaammut piginnittunit eqqumaffigineqarnissaannut siunnersuutinik pitsaasunik tusagaqarnissamut qilanaarpunga, ineqarnermut naalakkersuisoq Jens B. Frederiksen oqarpoq.
Naalakkersuisup IPK tikilluaqquaa aamma ukiormanna aningaasanut inatsit aqqutigalugu aningaasassarsereerlugu. Aningaasat taakku atorlugit IPK ineqarneq pillugu oqallinnermi peqataalissaaq. Aammalumi ineqartut nammineq piumassutsimik suliniartut naalakkersuisunit suleqatigineqalersaarput.
- Siunissami IPK-p suleqatigineqarnerani illuatungeriinni isummat pillugit annertuumik ataqqeqatigiinnissap atuunnissaa neriuutigaara upperalugulu. Naalakkersuisuni kattuffimmik suleqatigisinnaasatsinnik peqalermat nuannaarutigaarput, aammalu IPK nuna tamakkerlugu attartortunit annertuumik tapersersorneqarumaartoq, taamaalillunilu kattuffik sapinngisamik nukittuutut iliuuseqarsinnaasutullu inississinnaajumaartoq neriuutigisorujussuuarput, Jens B. Frederiksen oqarpoq ataatsimeersuarnerlu aallartippat saqqummiussaqarniarluni.
