Ineqartut inigisamut akiliisarnissaat attartortumit kajumissaarutigineqarpoq
Grethe Poulsen, Qasigiannguani Hotelimi eqqiaasartoq, INI A/S-illu inaataani najugalik oqarpoq, inissiaatileqatigiiffimmi INI A/S-imit inimik attartortut inigisaminnut akiliinissartik pingaartinnerusariaqaleraat.
Grethe Poulsenip Maniitsumi politiit innuttaasunik INI A/S-imut akiliisitsiniarnissaminnut piffissaqarsimannginneri najugaqartut inigisaminnut akiliinngitsoorsimanerinut utoqqatsissutissaannginnerarpaa. INI A/S-ip inaataani najugallit inigisaminnut qaammammut akiliinngitsoorsimagaangamik akiligassamik nasseqqinneqartarput. Akilinngitsoorsimasanik marloriarlutik nassinneqaraangamik politiinit akiliisinniarneqalersarput.
Maniitsumi ineqartut 50-it politiit sulisunik amigaateqarneri pissutigalugu politiinit akiliisinniarneqarnissaminnut piffissaqarfigineqarsimanngitsut, Grethe Poulsenip utoqqatsissutaasariaqarsorinngilaa.
- Ineqarniartut aamma akiligassat isumaginissaat eqqarsaatigisariaqarpaat, ineqartuusugut Ini A/S-imi najugallit allat anisitaagaangata inimut akiligassagut amerlanerulertarput, allallu akiligassaannik akilersueqataalersarluta, akiligassap suulluunniit isumagineqarnissaa eqqarsaatigineqartariaqarpoq, aningaasat allanut atorneqartariaqanngikkaluarput INI A/S-imut akiligassaqaraanni, Grethe Poulsen oqarpoq.
Aamma oqarpoq aqqusinermut inissinneqassanngikkaanni inimut akilersuinissaq pingaartinneqartariaqartoq.
Inissiaatileqatigiiffiup paasissutissiisartua Christine Stampe Frøsig ima nassuiaavoq.
- Akiliisinnaanngitsoqaraangat suliaq ingerlattarparput, kisianni inuppassuit aningaasaatitik akiligassanut atortussaagaluarlugit allanut atortarpaat.
Ineqartut inigisaminnut akiliisinnaanngikkunik ikiortissarsiortariaqartarnerat ilisimatitsissutigisarparput, akiligassanut ikiortissarsisinnaanngikkaanni akikinnerusumut nuunnissaq imaluunniit attartortut nalunngisaminni najugaqarnissaat siunnersuutigisarparput, tassami najugaqartut akiligassaat amerlavallaaleraangata iliuusissaaruttoqartarmat, INI A/S-ip qullersaqarfiani atorfilik Christine Stampe Frøsig oqarpoq.
