Ineqartunik kiffartuussineq pitsaanerulerpoq

Qaanaap Kommuneata siorna januaarip aallaqqaataani iniutiminik ingerlatsineq INI A/S-imit tigummagu innuttaasunut kiffartuussineq pitsaanerulerpoq.

Borgmesteri Naimanngitsoq Petersen oqarpoq, kommunemi sivisuumik eqqartorneqareersoq aalajangerneqarsimasoq ininik ingerlatsineq INI-mit tiguneqassasoq.

Ininut utaqqisut amerlagaluartut init ilaat sivisuumik inoqanngittarsimapput. Ullumikkut initaarniarneq sukkanerusumik ingerlalernikuuvoq.

Pitsaaqutit ilagaat INI-p ininut akit qaffatsippagit kommunip qaffatsinngissinnaammagit.

Aamma ininut aserfatsaaliinermut tungasunik sukkanerusumik aalajangiisarnerit pitsaanerulernikuulluni, Naimanngitsoq Petersen oqarpoq.

INI A/S 1995-imi pilersinneqarmat kommunit pingasut, tassalu Aasiaat, Qaqortoq Upernavillu INI A/S-imut ilanngutinngillat. Tasiilaq, Illoqqortoormiut Qaanaallu kingorna iniutiminnik INI A/S-imut ingerlatitsinertik unitsippaat.