Ineqarnermut politikki pisuunuinnaq iluaqutaasoq
- Ineqarnermut politikki qiviaraanni, ersinngitsumik ikiorsiisarneq atuuppoq. Ineqarnermut tapiissuteqartarneq ersippoq. Ersinngitsumilli tapiissuteqartoqartarpoq, tassa; erniakitsunik pisortat atukkiisarnerisigut, akileeraarnikinnerusarnikkut, nunamik attartornermut akiliisoqartannginneratigut, kiisalu illugisap inigisallu iluanaarutitai akileraaruserneqartannginnerisigut.
AAMMA ATUARUK Aningaasaqarnermut Siunnersuisooqatigiit sakkortuungaatsiartumik mianersoqqussuteqarput
- Taamaasillutik Namminersorlutik Oqartussat kommunillu iluanaarutissaqarneq ajorput. Iluanaaruteqanngikkunillu aningaasat allami pissarsiarisariaqarpaat. Tassa akileraarnerunikkut, imaluunniit ilinniartitaanermut peqqinnissaqarfimmulluunniit aningaasaliinikinnerunikkut, Aningaasaqarnermut Siunnersuisoqatigiit siulittaasuat Torben M. Andersen taama oqarpoq.
Allannguinerit pisariaqartut
Torben M. Andersenip erseqqissarpaa ineqarnermut politikki iluarsaanneqartariaqartoq, Namminersorlutik Oqartussat kommunillu aningaasat sumut atorneqartartut takusinnaalerniassammassuk.
- Inuiaqatigiinni atugarissaarnerit ikiorserneqartarput. Ikiorsiissutaasartullu aningaasarpassuusinnaapput. Aperisoqarsinnaavorlu aningaasanik agguaariaaseq taanna politikkerineqassanersoq, tassa isertitaqqortuut annertuumik ikiorserneqartarneri atuutsiinnarneqassanersoq, Torben M. Andersen apeqqusiivoq.