Ineqarnermut akiliutit qaffaqqeriaannaapput

Inissianik attartortittakkani aserorterinerit akiorniarnissaannut eqqakkallu piiaaneqartarnissaannut aningaasartuutit Namminersorlutik Oqartussat inissiaataanni najugaqartunut akiligassanngortinneqartaleriaannaapput.

Inissiani attartortittakkani eqqakkat iikkanilu titartuisarnerit ingammik Nuummi ajornartorsiutaaleriartuinnartut Inissiaatileqatigiiffiup ilisimatitsissutigaa. Aserorterisarnerup akiorniarnissaanut eqqakkanillu piiaasarnernut tunngatillugu INI A/S suliniuteqalissasoq, Namminersorlutik Oqartussat piumasaqarput, taamaattumik eqqakkat pisariinnerusumik piiarneqartarlernisaat januaarip aallaqqaataanit 2010 aallarnerlugu suliniuteqartoqartalissasoq, INI A/S nalunaarpoq.

Aserorterisarnernut eqqaaveqarnikkullu suliniuteqarnermut ineqartut suleqataanngippata allatut ajornartumik sulisunik amerlileeqqinnissaq pisariaqassasoq, INI A/S ilisimatitsivoq.

Sulisunik amerlileeqqittoqartariaqassappat aningaasartuutit ineqarnermut akiliutit aqqutigalugit akilerneqartalernissaat periarfissanngussasoq imaluunniit toqqaannartumik attartortunut akiligassiissutigineqartalernissaat, Inissiaatileqatigiiffimmit nalunaarutigineqarpoq.

Ineqarnermut naalakkersuisoq, Jens B. Frederiksen isumaqarpoq, inuusuttunut maligassiuilluarnissaq pingaaruteqartoq.

- Inuunitta avatangiisittalu akisussaaffigineqarnerulernissaat maanna piffissanngorpoq, ilami aningaasartuutitaqanngitsumik pinngortitamut eqqaaginnaajunnaartoqarsinnaajunnaarpoq, imaluunnit allat pigisaannik aserorterisoqaannarsinnaajunnaarluni, Ineqarnermut naalakkersuisoq, Jens B. Frederiksen oqarpoq.