Ineqarneq pillugu suliaq Kommuneqarfik Sermersuumi piffissami matumani pisoqartitsivoq.Assi: KNR / Malik Brøns

Ineqarneq pillugu suliaq: Aningaasaqarnermut ataatsimiititaliaq suliani arfinilinni ukiuni tallimani qaangiinnarneqartoq

Kommuneqarfik Sermersuup allattoqarfia Aningaasaqarnermut ataatsimiititaliaq ineqarnermut suliamut attuumassuteqartuni ukiuni tallimani arfinileriarluni akuersiseqqaarnagu iliuuseqarsimavoq.

Namminersorlutik Oqartussat Nakkutilliisui Kommuneqarfik Sermersuup ineqarnermut tunngatillugu periuserisartagaani assigiinngitsunik arlalinnik isornartorsiuinermik ilaqartumik tusagassiuutinut novembarip ulluisa qulingiluaanni nalunaaruteqarput.

Tusagassiuutinulli nalunaarut isornartorsiuinermut tunngavigineqartoq pillugu paasissutissartaqanngilaq.

Tamanna borgmesterip, Charlotte Ludvigsenip (IA) kommunimilu borgmesteriusimasup, Asii Chemnitz Narupip (IA) eqqarsartoqartippaat.

Taakku marluullutik Namminersorlutik Oqartussat Nakkutilliisuannik itinerusumik nassuiaateqartoqarnissaa piumasaraat.

AAMMA ATUARUK Nakkutilliisoqarfiup aalajangernera borgmesterip tupaallaatigaa

Nakkutilliisut assersuutigalugu borgmesteri pisuni pingasuni Aningaasaqarnermut ataatsimiititaliamut akuersititseqqaarnissamik qulakkeerinani inuussutissarsiornermi attartornermut isumaqatigiissutinut tunngatillugu unioqqutitsisimasutut inerniliissuteqarlutik isornartorsiuipput.

Pisulli sorlerpiaat pineqarnersut qangalu pisimanersut tusagassiuutinut nalunaarummi eqqaaneqanngilaq.

Nakkutilliisut Allattoqarfia kommunimut maanna akissuteqarluni isornartorsiuinini assersuutigalugulu qulaani eqqaaneqartut itisilerpai.

Inuussutissarsiornermi attartornermut isumaqatigiissutit politikkikkut suliarineqanngitsut

Nakkutilliisut pingasunik assersuuteqarput. Kommunip allattoqarfiata Aningaasaqarnermut ataatsimiititaliap akuersissuteqarfiginngisaanik isumaginnissimaneranut assersuut ataaseq 2016-imeersuuvoq, marlullu 2017-imeersuullutik.

Asii Chemnitz Narup kommunimi piffissami tassani borgmesteriusoq allattoqarfimmilu pisortat qullersaasoq inuussutissarsiornermi attartornermut isumaqatigiissutini pingasuni atsiorsimavoq.

Tassa isumaqatigiissutit Aningaasaqarnermut ataatsimiititaliap akuersissutigisimanngisai atsiorsimavai.

AAMMA ATUARUK Asii Chemnitz Narup aningaasaqarnermut naalakkersuisutut tunuarpoq

Asii Chemnitz Narup aningaasaqarnermut nunamullu imminermut naalakkersuisoq Nakkutilliisut isornartorsiuinerisa kingunerisaanik marlunngormat tunuarpoq.

Taassumali Nakkutilliisuni paasissutissat suli amigaatigai, taannalu suliami allagaatinik takunnissaanissamut qinnuteqarluni. Taamaammat paasisaqarnerusimaleriaruni aatsaat oqaaseqarniarpoq.

Tamatuma saniatigut pisuni marlunni tassa inuussutissarsiornermi attartornermut isumaqatigiissummik ilassummillu borgmesteriluunniit atsiorsimanngilaq. Tassani isumaqatigiissut Nuuk City Investimut isumaqatigiissut ilassullu 2020-mi apriilimi atulertoq pineqarput.

Assersuutit taakku marluk Nakkutilliisut oqarnerat naapertorlugu Aningaasaqarnermut ataatsimiititaliap isumagisimanngilai.

20 millionit koruuninik atortitsinissamut neriorsuut

Suliaq alla Kommuneqarfik Sermersuup Aningaasaqarnermut ataatsimiititaliaata aamma akuerisimanngisaa qanittumi saqqummiunneqarpoq.

Suliaq taanna 2020-meersuuvoq, tassanilu maanna borgmesteriusup, Charlotte Ludvigsenip allagaq Aningaasaqarnermut ataatsimiititaliamit isumagineqarsimanngitsoq atsiorsimavaa.

Allagaat kommunip inissiaatileqatigiiffiutaanut Iserimmut 20 millionit koruuninik taarsigassarsinissaanut neriorsuutaavoq. Aningaasat illunik 2025-mi pisinissamut atugassaapput. Taarsigassarsinisamilli neriorsuut Charlotte Ludvigsenimit atsiorneqartinnagu kommunalbestyrelsip akuerisimanngilaa.

Charlotte Ludvigsenip oqarnera naapertorlugu kommunip pisortaanerisimasaata, Lars Møller-Sørensenip taarsigassarsinissamut allagaammik atsioqqusimavaani.

Taamali oqarnera kommunimi pisortaanerusimasup ilisarisinnaanngilaa.

Ineqarneq pillugu periuserineqartoq unitsinneqartoq

Namminersorlutik Oqartussat Kommuninut Nakkutilliisoqarfiata Kommuneqarfik Sermersuup inissianut tunngasumi periusia novembarip ulluisa qulingiluaanni unitsippaa.

Taanna naatsumik oqaatigalugu Nuummi inissianik attartortakkanik 416-inik 2015-imiilli pissarsisoqarneranut tunngassuteqarpoq.

Kommunip inissiaatilinnut namminersortunut isumaqatigiissuteqarnerata kingunerisaanik inissianik 416-inik attartortoqarpoq.

Kommunilli inissiaatileqatigiiffini aqqutigalugu inissianik namminersortunut attartornermini aningaasartuutai attartortitsinermut akinut naapertuutinngillat. Tamannalu kommunip aningaasaqarneranut ukiumut millionerpassuarnik naleqarpoq.

Tamannalu kommunit piginnaatitaanerannut maleruagassanik unioqqutitsinerusoq Nakkutilliisut erseqqissaatigaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl