Ineqarneq pillugu politikki Nuummi nassuiarniarpaat
Ineqarneq pillugu nassuiaat Inatsisartuni maajip 23-at oqallisigineqareersoq nassuiaatip imarisai innuttaasut akornanni oqallisaapput. Inatsisartuni annertuumik nassuiaat taperserneqareersoq innuttaasut apeqqutissarpassuaqarput. Assersuutigalugu: Sooruna ineqarnermut akiliut qaffanniartoq?, Sooruna oquk taama ajornartorsiutaatigisoq?, Naalakkersuisut ineqarneq pillugu pilersaaruteqarpat? Maannalu apeqqutit tamakku akisussaasumut innuttaasut apeqqutigisinnaanngorpaat.
- Ineqarneq pillugu nassuiaammut tunngatillugu sinerissami arlaleriarlunga innuttaasunik ataatsimiititsisareerpunga, aammalu akissuterpassuit tigusimasakka nuannaarutigaakka. Maanna Nuuk tullinnguuppoq, innuttaasunillu ataatsimiititsinissaq taanna tassaavoq ineqarneq pillugu nassuiaatip Inatsisartuni oqaluuserineqarnerata kingorna innuttaasunik ataatsimiititsinissaq siulleq. Taamaattumik tamatumuuna allaanerulaartumik ingerlanneqassaaq, Jens B. Frederiksen nassuiaavoq.
Inissiat ullumikkut ajorluinnarput. Inissiat 1960-kkunni 90-ikkunnilu sananeqarnermik kingorna aserfallatsaalineqartarsimanngillat maanna najugaqartut naalliuutigisaannik. Taamaammat nunatsinni inissiat nutaamik nalilersugassanngorsimapput.
- Ineqarneq pillugu nassuiaat Inatsisartuni tigulluarneqarmat iluarisimaaqaara, aammalu suli naammagisimaarlugu. Uannut pingaaruteqarpoq partiit pissaanermik siunissami tigumminnittussat sorliussagaluarpataluunniit nukitta aaqqiissutissanut suliniutinullu siunissami atasinnaassuseqartussanngorlugit, isumaqatigiissutigineqarsinnaasunut atornissaat, Jens B. Frederiksen Nuummiunut nassuiaanissamut qilanaarnerartoq oqarpoq.
Soqutiginnittut tusarnaariarsinnaapput Katuami inersuaqqamut sisamanngorpat nalunaaqutaq 19.00. Jens B. Frederiksen naatsumik aallarniuteqarluni nassuiaat pillugu oqaaseqassaaq tamatumalu kingorna ineqarnermut naalakkersuisoq apeqquteqarfigineqarsinnaalissaaq.
