Ineqarneq pillugu naammagittaalliortarfeqalissaaq

Ineqarnermut akiliutivit qaffannissaa qaammatit pingasut sioqqullugit nalunaarutigineqarsimanngila? Ataatsimik sinittarfilimmut nuunnginninni ini iluamik suliarineqarsimanngila?

Ininik attartortut attartortitsisullu akornanni isumaqatigiinngissutaasinnaasut allat aamma naammagittaalliorfimmi nutaami siunissami aaqqiiffiginiarneqartassapput.

Naammagittaalliortarfimmi sulineq pisortatigoortumik apriilip aallaqqaataani aallartissaaq. Nunatsinnilu inissianik attartortut attartortitsisutik pillugit naammagittaalliutiginnissinnaanerat taamaalilluni ajornannginnerulissaaq.

Namminersornerullutik Oqartussat kommunillu inissiaataannik attartortut attartortitsisullu akornanni isumaqatigiinngissutit naammagittaalliortarfimmit akunniliuffigineqarlutik aaqqiiffiginiarneqartassapput.

Naammagittaalliornissamut ilitsersuut naqiterneqareerpoq, naammagittaalliortarfimmi inatsisileritooq formandiusorlu Annemette Larsen ilisimatitsivoq.

Kikkut tamarmik naammagittaalliortarfik pillugu paasissutissanik pisinnaaniassammata sinerissami atuakkanik atorniartarfinnut INI-llu allaffeqarfiinut ilitsersuut ilineqassaaq.

Naammagittaalliorneq 150 koruuneqarpoq. Inuit naammagittaalliornerminni aningaasat ilai tamakkerlugilluunniit utertoorutigisinnaavaat.