Indonesiami ujaasineq taamaatinneqalerpoq

Asiap kangimut kujasissuani qeqertarpassualimmi, Indonesiami, nunap arfininngormat sajorujussuarneragut inunnik annassimasinnaasunik ujarlerneq taamaatinneqalersoq nalunaarutigineqarpoq.

Nunanit allanit ikiuigasuartussat, atortussallu tikiussuunneqaleraluartut angummanniarsuaarput, annilaanngatigineqalermammi qaqqap innermik anitsisartup Merabip anitsinissaa ilimanarsisoq.

Qaqqarsuaq innermik anitsisartoq kilometerinik pingasunik portussusilik, Merabi, ullaarli aniatitsiualersimavoq.

Nunap sajorujussuarnerani qaqqap qaavata qalippernerata quppaa ujarassiuut suli annerulissangatippaat; taamaalippallu anngaq aamaartoq, gassit, arsakut pavungarsuaq qaaruppagit nunap sajunnerani angerlarsimaffeeruttut 200.000-init amerlanerusut suli ulorianartorsiornerulissapput, annaassiniarnerlu ajornarnerulersissallugu.

Angerlarsimaffeeruttorpassuit ikiorneqarnissaminnik, pingaartumik tupissaminnik, suli utaqqipput; napparsimmaviit ikilersimasunik ulikkaarput, annattullu queersimaqisut naalakkersuisumik kigaalaarpallaarnerat kappialaatigaat. Indonesiap præsidentiata Zushilu Bang-Bang Jordanujup isornartorsiuinerit tusaatissatut tigunerpai, annaassiniarnerullu ataqatigiissaarneqarnerunissaa atorfilittaminut isumageqqullugu.

Nunap sajunneragut eqqugaasut amerlassusaat naalakkersuisut, eqqorneqartullu isumaqatigiinngissutigaat.

Nunani sajuffiusuniittut toqusortatik 5.100-nerarpaat, ikilikkallu 20.000it sinneqarnerarlugit - naalakkersuisut nalunaarutaannit amerlanerungaartut.

Ajunaarnerup annertussusaa naalakkersuisut isertuunniarsarileraat pasitsaanneqarpoq.