Indonesiami qarsutsinersuaq ingasalluinnarpoq

Indonesiami illoqarfiit pingaarnersaanni Jakartami qarsutsinersuit patsisigalugit innuttaasut 200.000-it angerlarsimaffimminnit suli qimarngusimasariaqarput, mannalu tikillugu inuit 36-t ajunaarsimapput. Illoqarfiup annersaa sisamanngormalli qarsutsivigineqarpoq. Sumiiffiit ilaanni aqqusinerni imeq meterinik pingasunik qaffasissuseqarpoq silasiortullu siallileqqinnissaa ilimasaarutigaat.

Kuussuit qarsutsisorsuupput, imerlu qarsutsisoq anartarfiit kuuffiinut akulerussimammat imeq toqunartoqalersimasoq inuit naloraarfigaluguluunniit naluffigisariaqarpaat.

Peqqissuunissamik suliaqartut nappaatit imeq aqqutigalugu tunillaassuussinnaasut aarleqqutigaat.

- Teriarsuit kakerlakkillu sianigisariaqarpavut aamma inuit qaqorsaaserlutik uffartassapput, Jakartami peqqissuunissamut aqutsisoqarfimmeersoq oqarpoq.

Ilaasa nappaatit tunillaassuuttut, soorlu malaria, kolera aattalimmillu anartarneq, dysenteri, mianersoqqussutigaat. Illoqarfiup ilaani nakorsaatinik amigaateqartoqarpoq inuillu ilaat timmittorsuusut nalunaarutigineqarpoq.

Indonesiami siallersarnerata nalaani qarsutsisoqartarnera takornartaanngikkaluarpoq, illoqarfiilli pingaarnersaanni qarsutsisoqartarnera qaqutigoortuugaluarpoq aamma taamarsuaq qarsutsisoqartillugu misigisimanngisaannarpaat. Avatangiisinik illersuisut oqaatigaat, qarsutsinersuaq ilaatigut inuit pilersitarigaat. Illoqarfiup avataatungaaniittut kussiat ukiut kingulliit 30-t ingerlaneranni ikiliserujussuarneqarsimapput, pisoorsuit illorsualiorumallugit orpiit killorneqartarsimapput aamma pilersaarusiornerlunneq aserfallatsaaliinerlunnerlu uparuarneqarlutik. Sapaatip akunnerani kingullermi sialussuarluni aallartimmat kussiat eqqakkallu aqqutaat eqqakkanik ima ulikkaartigipput allaat kuuffigineqarsinnaanngingajallutik. Sialussuarneranit kuussuit qarsutsilerput ungalullu qarmakkat suppunneqarlutik.

Indonesiami pilersaarusiornermut ministerip oqaatigaa qarsutsinersuit maannamut 2,5 milliard koruuninik akeqarsimasut.