Indonesiami nuna sajorujussuarpoq

Indonesiami nuna sakkortuumik ullaaq sajummat inuit 3.000-t ajunaarput, allallu 200.000-it angerlarsimaffeerullutik.

Ajunaartut qallunaartaqarunanngitsut, Ritzau ilisimatitsivoq.

Indonesiami qanga kunngersuit najugarisimasaattut ilisimaneqartumi Jogjakarta-mi takornariaqarfiulluartartumi nuna ullumi sajorujussuarmat ajunaartut qassiorpiarnersut suli nalunarallarpoq. Indonesiami ikiuiniaqatigiit Røde Korsimi nakorsaq nalunaarpoq toqqit, inuussutissat nakorsaatillu angerlarsimaffeeruttunut 200.000-inut atugassat pisariaqartinneqartut. Røde Korsimi sulisut 400-t maanna inunnik qimarngussuileruttorput.

Inuppassuit nunap sajoqqinnissaanut annilaanngapput, nunap sajunnera Richterip uuttuutaa malillugu 6,2-usoq sakkortusimaqaaq.

Jogjakartap 50 kilometerinik kippasissortaata kujataani pisimavoq, illoqarfiit pingaarnersaannit Jakartamit 450 kilometerisut ungasitsisisumi.

Nunap sajunnerata aallartiffia Indiap imartaani sinerissamit 25 kilometerinik avasitsigisumiippoq, taamaakkaluartoq tassaarnersuarmik pilersitsinani.

Indonesiap kujasissuani illorpassuit nakkaaffiat inuttoqaaq, nunallu sajunnera ima sakkortutigisimavoq nunap avannaani allaat malugineqarsinnaasimalluni.

Jogjakartami mittarfik matuneqarsimavoq, illoqarfiillu ilarujussua innaallagiaqanngilaq.