Inuit ikinnerpaamik 125-t arsaattarfimm uivernersuaqarnerani toqutaapput. Politiit gassimik qulliliornartumik atuillutik eqqissiviilliortut avissaartinniarsarimmassuk inuit amerlasuut nanerneqarlutik toqupput.Assi: Str/Ritzau Scanpix

Indonesiami isikkamik arsaattoqareernerata kingorna arsaattarfimmi uivernersuaqarmat inuit ikinnerpaamik 125-t toqutaasut

Indonesiami illoqarfimmi Malangimi isikkamik arsaattarfissuarmi uivernersuaqarmat eqqissiviilliortut gassimik qulliliornartumik avissaartinniarsarineqarput, uivernersuaqarneranilu inuit amerlasuut ajunaarlutik. Toqusut amerlassusaat siullermik 174-iuvoq, kingornalu tamanna allanngortinneqarpoq, ikinnerpaamik 125-t ajunaartut oqaatigineqarluni.

Indonesiami qeqertami Javami arfininngornermi unnukkut isikkamik arsaattoqareernerata kingorna eqqissiviilliortoqarlunilu uivernersuaqarmat inuit ikinnerpaamik 125-t toqutaapput, allallu 320-t aqqunartiterlutik.

Indonesiami oqartussat sapaammi taama nalunaaruteqarput.

Inuit ikinnerpaamik 174-it toqutaasimasut siullermik oqaatigineqaraluarpoq.

Inuppassuit uivernersuaqarnerani toqusut Indonesiami oqartussat nalunaarutigigaat nutaarsiassaqartitsiviup DPA-p allaaseraa.
Arsaattunik isiginnaariartut arsaattarfimmut isaalermata politiit gassimik qulliliornartumik atuillutik eqqissiviilliortut avissaartinniarsaraat.

Amnesty Internationalip isumannaallisaaniarneq apeqquserpaa, politiillu peqqarniisaarniarat aamma isornartorsiorlugu.

Inuit amerlasuut toqusut eqqaaniarlugit ullumi sapaammi naasuliiartorput.

Arsaattarfik 38.000-nik isiginnaariartoqarsinnaavoq, billetsillu 42.000-t tunineqarsimallutik. Eqqissiviilliortoqarsinnaanera Indonesiami oqartussat ilimagereersimavaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl