Indonesiami inuit 77-it ajunaarput

Innermik anitsineq unnuami pimmat inuit sinnguttut eqqugaanerupput, taama allappoq Ritzau.

Inuit 77-it ajunaartut Indonesiami oqartussat nalunaarutigaat, 160-it aqqunartitersimallutik - taakkunannga amerlaqisut uutitersimaqalutik.

Nunaqarfimmi Argomulyo-mi ajunaartut meeraanerusimapput, annaassiniartartut oqaaseqartartuat taama nalunaarpoq. Argomulyo innermik anitsiffimmit 18 kilometerisut ungasitsigisumiissimavoq. Annaassiniartut oqaluttuaraat illoqarfeeqqami illuni ataatsimoortuni inuit 31-t toqungasut nassaarineqarsimasut. Taakkulu siniffimminniittut nassaarineqarsimallutik.

- Timaat uutitersimasupilussuupput. Nassaarisatta ilagaat anaanaq ataatarlu meerartik pingatsiullugu siniffimminni toqungasut, annaassiniartartoq Utha oqaluttuarpoq.

Innermik anitsisartoq oktobarimi itertuusimmalli ullaassaq aatsaat taama sakkortutigisumik innermik anitsivoq.

Anitsiffiup eqqaaniittut inuit maanna qimarngussuunneqarput. Ilimagineqarpoq inuit 100.000-it missaanniittut maanna allamut nuutsinneqarsimanissaat.