Indonesiami inuit 100.000-it missaanniittut qimarngussuunneqarput

Innermik anitsineq unnuami pimmat, inuit sinnguttut eqqugaanerusut, Ritzauimi allaaserineqarpoq.

Qaqqaq innermik anitsisartoq oktobari naalersorli anitsilermat, ippassaq anitseqqilernera aatsaat taama sakkortutigaaq.

Sakkortuumik anitsilernerata kingorna, tamaani oqartussat, inuit amerlanerusut qimarngussorneqarnissaat naalakkiutigisimavaat. Inuit 100.000-it missaanniittut qimarngussuunneqareerput.

Indonesiami qaqqap innermik anitsisup qullaatsitai ima annertutigipput, allaat Indonesiami illoqarfiit pingaarnersaannut Jakartamut, qaqqamit innermik anitsisumit 450 kilometerinik kangisinnerusumiittumut timmisartuussinerit ullumi taamaatiinnarneqarlutik.

Nutaarsiassaqartitsivimmit AP-mit oqaatigineqarpoq, napparsimmaviup anginngitsup qaqqap innermik anitsisup ungasinngisaanniittup, inuit ikiortariallit kiinnamikkut uutitersimanngikkaangata imaluunniit timimikkut 40 procenti sinnerlugu uutiterneqanngikkaangata anisiinnartariaqartarai.

Qaqqaq innermik anitsisartoq Merapi, ukiuni 100-ni kingullerni arlaleriarluni innermik anitsisarpoq, taamaattorli inuppassuit sivinganerini najugaqarusuttarput, tamaani nuna naggorissuummat.

Qaqqaq innermik anitsisartoq taanna 1994-imi ulluni arfineq marlunni anitsimmat, inuit 60-it ajunaarput, 1930-milu sakkortuumik anitsineratigut, nunaannarmiut 1300-t ajunaarlutik.