Indonesiami eriagisariallit ilaat aseruatiterput

Indonesiami nuna ippassaq sajorujussuarmat inuit ajunaarsimasut maannamut 4.600-nut tagginneqarput, 20.000-it aqqunartitersimallutik hunnorujutusindikkuutaallu angerlarsimaffeerullutik.

Indonesiami qeqertarpassuit ilaanni Javami nunap ippassaq sajorujussuarnerata kingorna 450-eriarluni nuna sajuallaqattaareersoq, aviisi Politiken allappoq.

Dansk Røde Korsimeersoq Peder Damm ajunaarfimmut takuniaasimareerluni takusani amiilaareqai: Nunaqarfiit arlalissuit suujunnaartinneqapajaarsimapput. Aqqunartitertut napparsimmavinni inissaqanngillat, taakkulu arlaatigut ikiorserniarlugit suliniartoqaleruttorpoq

Indonesiami oqaluttuarisaanermut pingaaruteqarluartoq naalaffissuaq Prambanan aseruatiterujussuarpoq.

Naalaffissuaq taanna Naalagaaffiit Peqatigiit Nunarsuarmi kinguaat kingornutassaattut eriagisatut suaarutiginikuusaat maanna matuneqarallarpoq, tullinnguupporlu itsarnisarsiuut aseruatitikkat qanoq annertutiginerinik misissueqqissaarnissaat. Tamannalu qaammaterpaalunni ingerlasinnaassaaq.

Naalaffissuarmi naalaffeeqqat annerusut minnerusullu 250-t nassaassaapput, ukioq 1000-p missaani hindumik upperisallit Indonesiami amerlagallarmata naalaffiit annersaasa ilagisimallugu. Taanna ukiumut inunnit millionikkuuttaanit takornariarneqartaraluarpoq.