Indonesiami aallartitaqarfik ammaqqilerpoq

Danmarkip Indonesiami aallartitaa Indonesiap illoqarfiisa pingaarnersaannut Jakartamut ullumi tikippoq, aallartitaqarfiup tamaani erniinnaartumik ammaqqinnissaa isumagiartorlugu.

Danmarkimi aviisip ullormut saqqummersartup, Jyllands-Postenip, Muuamaamik titartakkat saqqummersitai aaqqiagiinngissutaaqisut pissutigalugit Indonesiami aallartitaqarfik matuneqarpoq, sulisullu tamaasa naalakkersuisut angerlartippaat. Indonesia nunarsuatsinni muuamaakkoqarfiunerpaanut ilaavoq, sakkutuullu muuamaakkuusut aallartitaqarfimmiunut sioorasaarimmata, aallartitaqarfik matuneqaraluarpoq.

Jakartami aallartitaqarfiup silataani saassusseqqinnissartik sakkutuut muuamaakkuusut taamanili sioorasaarutigisarsimavaat.

Indonesiamut aatsaat pisariaqavitsillugu angalasarnissaq nunani allani ministereqarfiup inassutigaa, Sumatralli avannaatungaani illoqarfeqqamut Aceh-mut aamma Sulawesimut Ambonimullu angalanissat tamarmik inerteqqutigineqarallarput.