Indianerit Inuillu Pave-mit utoqqatserfigineqassapput
Ataatsimiinnermi tassani Pave Benedikt naggueqatigiit indianerit inuillu utoqqatserfigissavai, Canadami nunap inuiisa meerartaat 1980 tikillugu Canada-mi naalakkersuisunit atuarfinnut aallarunneqartarsimanerat pillugu. Atuarfiit tamakku upperisarsiortut aqutsisuinit ingerlanneqarput.
Paavimik ataatsmeeqateqarnissami apriilip ulluisa 29-anni Rom-imi pisussami, Canada-mi indianerit høvdingiat Phil Fontaine indianerillu siuttui allat sisamat kisimik qaaqqunneqarput. Naggueqatigiit Inuit Pave-mik ataatsimeeqateqarnissamut aggersarneqarsimanngimmata Canada-mi eqqumiigineqarpoq. Maannali Mary Simon Inuit Tapiriit Kanatami præsidenti aamma Peter Irniq Nunavumi siulittaasuusimasoq Pave-mik ataatsimeeqateqarnissamut qaaqquneqarput, Canada-mi ilanngutassiortoq Marianne Stenbæk ilanngutassiamini oqaluttuarpoq.
Naggueqatgiiit inuit indianerillu angerlarsimaffimminnit peersitaallutik atuarfinnut aallarunneqarlutik atornerlunneqartarlutillu pineqartarsimanerat pillugu Pave Benediktip utoqqatsernissaa naatsorsuutigineqarpoq.
Naggueqatigiit Inuit meerartaat 5000-it missaannik amerlassuseqartut 1950-ip 1980-illu akornanni angerlarsimaffitsik qimallugu atuarfinnut atuariartortitaapput. Naggueqatigiit Inuit indianerillu taamatut pineqarsimanerat pillugu Canada-miut ministeriunerat Stephen Harper juunip qaammataani siorna Canada sinnerlugu utoqqatsissuteqarpoq.
Statsministerip utoqqatsernerani Canada-mi inatsisartut ataatsimiittarfianni pisumi, Mary Simon aamma Peter Irniq najuupput.
Utoqqatsertoqarnerata kingorna Canada-mi saammaasseqatigiinnissaq eqqortussarlu anguniarlugu ataatsimiititaliamk pilersitsisoqarpoq. Ataatsimiititalimi ilaasortat Canada-mi angalassapput, naggueqatigiit inuit indianerillu tusarnaavigissallugit inuunerminni qanoq ingerlariaqqissinnaanerat tusarniassallugit, qangalu eqqunngitsumik pineqarsimanertik saammaassinnaaneraat tusarniassallugit.
Pave-p utoqqatsissuteqarnissaa arlaannaataluunniit aatsorsuutigisinnaasimanngikkaluarpaa.
Mary Simonip aama Peter Irnip Pave Benedikt Vatikan-imi ataatsimeeqatigilerunikku pingaartorsiussaqaat tanngassimaarlutillu.