Indianerit inuillu OL-imut ilaanerutinniarneqalerput

Canadap avannaani, Nunavimmi, Yokonimi Nunavummilu naalakkersuisut ulluni marlunni ataatsimiinnerat sapaatip akunnerani matumani ingerlanneqarpoq. Nunap avannaatungaani issittortaanilu sakkutooqarneq pisariaqartoq naalakkersuisut pingasuusut isumaqarput. Matumani sineriammik isorartuumik nunallu ilaanik annertuumik nakkutilliinissaq taamatullu nunamik piginnittussaaneq eqqarsaatigalugit.

Yokonimili naalakkersuisut siulittaasuat Dennis Fentie ataatsimiinnerup kingorna oqarpoq, sikumik aserorterutit sakkutuullu iliuuseqarnerup ilagiinnartussagai taakku saniatigut Canadami naalakkersuisut attaveqarnermut tunngasutigut, issittumi pingaaruteqarluinnartunut aqqusinernut, umiarsualivinnut inissianullu annertusaasariaqarput.

Silap pissusaata allannguutaanik, issittumi takuneqarsinnaasunik, sikup aakkiartorneranik nunap qeriuaannartup aakkiartorneranik uumasullu naalliunnerannik, allanngueratarsinnaasunik malittarisassanik iliuusissanillu Canada-p nunallu allat atuuttunngortitsinissaat pingaaruteqarluinnartoq Nunavummi naalakkersuisut siulittaasuat Eva Aariak oqarpoq.

Ilaatigut tullianik ukiuunerani olympiaageqarnissaani Vancouverimi ingerlanneqartussami nunap immikkoortuini pingasuusuni indianerit inuillu pitsaanerpaamik sinniisuutitaqarnissaat pillugu pilersaarummik imaqartumik suleqatigiinnissamik isumaqatigiissummik nutaamik atsiornermikkut naalakkersuisut siulittaasuisa pingasuusut ataatsimiinnertik naggaserpaat.