Indianerinut qinersineq pingaarutilik

Canadami indianerit qullerpaatut høvdingissaminnik sapaatip akunnerani matumani qinersissapput. Qinersineq tamanna Canadami naggueqatigiinnut Inunnut aamma pingaaruteqarpoq, tassami høvdingit iliuusaasa ilarpassui, naggueqatigiit Inuit politikkiannut ulluinnarnilu inuunerannut sunniuteqartarmata. Ataatsimut isigalugu qinersineq Canadami nunap inoqqaavisa siunissaannut pingaarutilerujussuuvoq, maannalu qinersinissaq pisarnermit pingaaruteqarnerusutut immaqa taaneqarsinnaalluni.

Qinersineq allaanerussaaq, ilaatigut qinigassanngortittunit arfineq pingasuusunit sisamat arnaagamik. Minnerunngitsumilli qinigassanngortittut qineqqusaarutaat apeqqutinut nutaanut pingaaruteqarnerusunullu tunngassuteqaramik.

Høvdingit siornatigut qineqqusaaraangamik ilinniartitaanerup pitsaanerulernissaa, peqqissutsimik isumaginninnerup pitsaanerulernissaa tamakkununngalu assingusut qineqqusaarutigisarpaat, maannali allanik pingaarnerutitaqarluni qineqqusaartoqarpoq. Maannami nunap pisuussutaanik atuinerup ineriartortinneqarnissaa pineqarpoq.

Maannamut  høvdingiusup Shawn A-in-chut Atleop oqaatigisarpaa, Canadami aatsitassarsiornermik pilersaarutit tamarmik tamakkiisumik ilaannakuusumilluunniit nunap inoqqaavisa nunaanni pisartut.

Taamaalilluni aatsitassarsiornermit akileraarutitigut isertitsinissaq kisimi pineqanngilaq, maannali suliniutini peqataanissaq imaluunniit siuttuunissaq pineqarluni. Aatsitassarsiortitseqatigiiffissuit indianernut aamma naggueqatigiinnut Inunnut toqqaannartumik nunagisaat pillugit isumaqatigiinniarnissamut pisussaaffilerniarneqassapput.

Nunap immikkoortuini indianerit høvdingii 630-t sapaatip akunnerata matuma naanerani Toronto-mi qullerpaatut høvdingissaminnik qinersinissamut atatillugu katersuuttut, qullerpaatut høvdingeqarusupput, soqutigisaminnik illersuisinnaasumik aamma pilersaarutinik indianerit avatangiisaannik kulturiannillu akornusersuisunik unitsitsisinnaasumik.

Tassa pisuussutinik atuinermik ineriartortitsineq, nunap inoqqaavisa maanna tassa aqukkusuppaat. Qinersinissaq pissanngatigineqaqaaq.