Indianeq: Naalakkersuinikkut ingerlatsinerup aalajaattuaannannginnera nukittoqutaavoq
Nunatsinni naalakkersuinikkut ingerlatsineq suliffeqarfiillu, soorlu nunanut Europamiittunut sanilliullugit, malunnartumik allanngornernit sunnerneqarsimanerusarput. Tamannali ajortutut oqaatigisariaqanngilaq, taama isumaqarpoq Darren J. Ranco. Taanna suliffigisamini Dartmouth universitetimi suleqatini allat sisamat ilagalugit massakkut Nuummiippoq. USA-mi universitetit ataqqisaanerpaartaasa ilaanni ilisimatuujunermi saniatigut nunap inoqqaavinut ilaavoq, indianernik Penobscot-inik siuaasaqarami.
Taassuma naalakkersuinikkut ingerlatsinerup aalajaattuaannannginnera nukittoqqutitut isigaa. Tamanna suliffeqarfiit nunasiaatilinnit eqqunneqarsimasut kulturerisamut naleqqussarniarnerinut takussutissaanerarpaa aamma tamanna nunap inoqqaavisa akornanni takornartaannginnerarpaa.
- Ungasinnerusoq isigalugu nukittoqqutaasutut isigaara, tassami matumani pineqarmata nunap inoqqaavi nunarsuarmi nutaaliaasumi inuusut, tassa danskit suliffeqarfiutaat kingornunneqarsimasut inuiaqatigiit Inuit siunissaannut naleqqussarniarneqarmata.
USA-mi Canadamilu nunap inoqqaavisa akornanni suliffeqarfiit taamaattut aamma uagut ilungersuutigaavut. Nunarsuarmut nutaaliaasumut kulturitsinnullu naleqqussarniarsaraavut. Inuuvugut ullutsinni nutaaliarpassuit akornanni inooqataasut, taamaattorli ileqqutoqqatsinnut nunagisatsinnullu attaveqarnerput pigiinnarusupparput. Tamatumunnga aammattaaq pissutaaqataavoq suliffeqarfiit nunasiaanitsinnit kingornussarigatsigik, taakkualu uatsinnut tunniussaapput imaluunniit peqquneqarnitsigut pisussaaffigilernikuuavut maannalu nammineerluta pigilerniartussaavavut uatsinnut kulturitsinnullu naleqqussarlugit.
Taamatut allanngoriartornerup kinguneranik naalakkersuinikkut ingerlatsineq pisoqarfiusaqaaq allanngorartaqalunilu, taamatullu maani pisoqartoq takusinnaavara.
Kalaallit Nunaata siunissaa pillugu oqaloqatigiinneq qiimmaammernartumik isumassarsinartuuvoq, tamannalu naggueqatigiit Inuit siunissaattut isigaara, Darren J. Ranco oqarpoq.
Darren J. Ranco Harvard Universitetimi inuiaqatigiit pissusiinik misissuisutut Ph.D-mik ilaatigut ilinniarsimasuuvoq.
