Indiamiut peqqissaasorpassuit Danmarkimut suliartorumagaluarput

Qinnuteqartorpassuit ilaatigut Indiami suliffissarsiuussisartut pilerisaarutaannik pissuteqarput, peqqinnissaqarfimmillu aqutsisut ulapissimaqaat.

Danmark peqqissaasunik 2500-t missaannittunik amigaateqarpoq, nunanillu allamiunik pissarserusulluni. Tamanna Indiami suliffissarsiuussisartut paaseriataarsimavaat, tamatumalu kinguneraa peqqissaasut Indiamiut 4500-t Danmarkiliarniarlutik siulliuniullutillu sassarsimammata.

-Danmarkimi peqqissaasut amigaataanerat ima nalunaarutigineqarpoq: Danmarkimukarit, danskit oqartussaasuinut akuersissutivit suliarinissaa isumagissavarput qaammatillu arfinillit arfineq-pingasulluunniit qaangiuppata Danmarkiliarsinnaavutit sulilerlutillu, akissarsiarissaarlutit taakkualu isumaginerinut uagut taamaallaat 150 dollarsit pissarsiarissavavut, taama oqarpoq Niels Prip suliffeqarfimmi Job Ikonimi pisortaq.

Danmarkimi ilisimatusarnermut ministereqarfiup siulliulluni qinnuteqaatit taakkua tuusintilikkuutaartut tiguai.

-Majip naalernerani junimi julimilu ilinniarnertuutut ikiortit marlussuit attartorpavut, taamatut oqaluttuarpoq Anders Gertsen aqutsisoqarfimmi qinnuteqaatinik suliaqartoq. Aqutsisoqarfiup allagarpassuit issoqisut 50-it tikillugit quppernillit Indiamiunit neriulluartuninngaanneersut tigusarpai. Kingornalu taakkua tamarmik peqqinnissaqarfimmi aqutsisunit akineqarput Danmarkimi sulilernissaq akuersissuteqarfigineqarnissarlu taama ajornaatsiginngitsoq. Taamatut akissuteqarnerup kingorna sap. akunnerisa marluk ingerlaneranni qinnuteqaaterpassuit ikileriarsimapput

Amerlanerpaajugamik qaammatip ataatsip matuma siorna sap. akunneri tamaasa peqqissaasut 700-t qinnuteqartarsimapput.